अध्यात्म विराम ४३

अध्यात्म विराम ४३

ईश्वरी नामाच्या स्मरणाचा अजून एक लाभ आणि स्मरणाच्या या प्रदीर्घ अभ्यासाचं सार म्हणजे ईश्वराच्या अर्थात ईश्वरी नामाच्या लहरी नित्य श्रुतीवाटे, कीर्तन, प्रवचन, भजन या मार्गाने,मेंदू, मन यातून, हृदयी पोचल्या तर त्या नित्य चिंतनात राहतात. नित्य चिंतनात राहिल्या तर, त्यांचा नित्य अभ्यास होतो आणि नित्य अभ्यासल्या जातात.

नित्य अभ्यासल्या गेल्या तरच, अंतसमयी त्या स्मृतीतून, मनाच्या पृष्ठ पटलावर येऊन, अंत समय साधला जाऊ शकतो. म्हणून नित्य ईश्वरी नामाचा अभ्यास, जागर करत जाणं हेच प्रत्येक आत्म्याच्या हिताचं आहे आणि तोच ईश्वराचा,आत्म्याला,मानवी देह देण्याचा,अंतिम उद्देश सुद्धा आहे. तो साध्य करावा. अजून एक कारण यामधे ध्यानात घ्यायला हवं, ते म्हणजे ईश्वरी नामाच्या लहरी, या समस्त विश्वात शुद्ध, सकारात्मक, गुणातीत, वृत्तिरहित आणि मायेच्या पार असतात.

याचा मतितार्थ असा की, ईश्वरी नामाच्या स्मरणात उत्पन्न लहरी या, कोणत्याही गुणांनी बद्ध होत नाहीत. त्यांना वृत्ती,विकार,वासना,मनातील, कलह, इत्यादी कोणत्याही गुणांनी किंवा अवगुणांनी बाधा किंवा बद्धता येऊ शकत नाहीत. म्हणजेच आपण जर एखादा विचार करत असू तर, इतर कोणताही विचार, विकार इत्यादी त्या विचारांना छेद देऊन, आपलं विचारचक्र थांबू शकत नाही. इतकं बल त्या ईश्वर स्मरणात असतं. 

या उलट इतर वेळी, सुरळीत चाललेले आपले विचार सहज भरकटात. मुळात हे विचारांचं भरकटून जाणं, अनेक गोष्टींवर अवलंबून असतं. पण यामधे एक समान धागा असतो,तो म्हणजे, काही कारणाने, आपण करत असलेल्या विचारांची जागा, एखादा नवीन विचार घेतो आणि मग मूळ मुद्दा वा विचार बाजूला राहतो. म्हणजे ज्यावेळी आपण सकारात्मक राहण्यासाठी, प्रयत्न पूर्वक उत्तम विचार जोपासतो, त्यावेळी इतर अनेक विचार आपली मान वर काढतात.

पण हे सर्व तेंव्हाच शक्य आहे जेंव्हा, या मर्त्य जगातील कोणताही विचार आपण करत असू. जर हाच विचार ईश्वराच्या नामाच्या स्मरणातून आलेला असतो, तेंव्हा त्या लहरींना ईश्वरी अधिष्ठान प्राप्त झालेलं असतं. अश्या उच्च पातळीवरील विचार लहरी, अत्यंत सात्विक, शुद्ध तर असतातच. पण पूर्ण सक्षम व शक्तिमान असतात. 

असो, स्मरणाबद्दल आपण हेच चिंतन उद्याच्या भागात सुरू ठेवूया. 

क्रमशः

श्रीकृष्णार्पणमस्तू!! 

©® संकल्पना, विचार व लेखन : प्रसन्न आठवले

१३/१२/२०२२

9049353809 व्हॉट्सॲप

9960762179