अध्यात्म विराम ९८

अध्यात्म विराम ९८

 

हित या शब्दाबद्दल पुरेसं चिंतन झालं आहे. त्यामुळे खरा हितदर्शी ईश्वर का आहे आणि तो कधी सहाय्य करण्यास धावून येईल आणि न आल्यास, त्यातही आपलं हितच आहे,हे जाणण्याची जाणीव आपल्यामध्ये जागृत झाली असेल, असं गृहीत धरून, आपण आता हा विषय पुढे नेऊयां. आता जो खरं हित जाणतो आणि ते जपून आपल्या हिताचं रक्षण करतो, तो खरा आपला सखा. वास्तविक पणे सखा या शब्दाची अनेकांनी अनेक प्रकारे व्याख्या केली आहे, तरीही आपण पुन्हा एकदा त्या शब्दाच्या संज्ञेत जाण्याचा प्रयत्न करूया.

सखा हा शब्द उलट लिहिला की, त्याचा एक अर्थ त्वरित ध्वनित होईल. खास. म्हणजे जो आपल्यासाठी खास आहे तो सखा. पण हे खास असणं, म्हणजे काय तेही समजून घेऊया.खास म्हणजे, ज्याची जागा खास कुठेतरी असते, तो सखा. पण असे अनेक स्नेही असतात जे सुख आणि दुःख किंवा फक्त सुख व फक्त दुःख यामधे खास असतात. पण ते सखा या व्याख्येत बसतात का याचा सुद्धा विचार करूया. 

काहीजण, इमानाने आयुष्यभर आपल्याला सुख आणि दुःख यामधे साथ देतात. ते नक्कीच मनाच्या व हृदयाच्या खास जवळचे असतात. पण त्यांना सखा म्हणायचं का. कदाचित त्यातील काही, आपल्याला योग्य वेळी आर्थिक मदत नक्कीच करतात किंवा करू शकतात. पण सखा या खास शब्दात कोण येतं किंवा येऊ शकतं, याचा मागील काही भागातून मिळालेल्या ज्ञानातून निष्कर्ष काढला तर लक्षात येतं की, सखा दोन प्रकारचे असतात.

एक जे या ऐहिक व आधीभौतिक जगतात, जीवन सुसह्य व्हावं आणि दुःखातून, भोगातून मार्ग मिळावा म्हणून हे आपल्याला अनेक प्रकारांनी, सहाय्यभूत होतात, ते या जगतातील आणि पहिल्या प्रकारातील सखा. त्यांचे आणि आपले कर्मधिष्ठीत संबंध असतात. ते कर्म बंधना तून निर्माण झालेले आणि ऋणातून घडलेले सखे. त्यांचं महत्व कोणत्याही प्रकारे कमी होत नाही. किंबहुना आयुष्यात भोगातुन पुढे जाताना आणि सुखाच्या वाटेकडे घेऊन जाणाऱ्या मार्गातील महत्वाचे पथदर्शी असे हे सखे असतात. 

दुसऱ्या प्रकारातील सखे हे आपलं आधी आत्मिक सखे व या जगतापार जाणाऱ्या मार्गावर आपले पथदर्शी, दिशादर्शक, मार्गदर्शक असतात, होतात आणि त्या मार्गात कायम आपलं फक्त आणि फक्त अध्यात्मिक हित जपतात व त्यासाठी आपल्याला आवश्यकता आहे तिथे पूर्ण सहाय्यभूत होतात. हे सखे कोण यावर उद्याच्या भागात चर्चा करूया. 

क्रमशः

श्रीकृष्णार्पणमस्तू!! 

©® संकल्पना, विचार व लेखन : प्रसन्न आठवले

०६/०२/२०२३

9049353809 व्हॉट्सॲप

9960762179