माळ सातवी २०१७

अश्वीन शुद्ध सप्तमी
नवरात्री सातवा दिवस
माळ सातवी अर्पण

आई आदिशक्ति जगन्माता म्हणजे साक्षात परम आत्मा. आणि आपण भक्त म्हणजे आत्मा, ईश्वरी शक्तिचा अंशात्मक भाग.  ख़र तर त्याच शक्तिपासून अलग झालेला आणि मूळस्वरूपाचा विसर पडल्यामुळे भावसागरात, संसारात अडकलेला. प्रत्येक जीव, हा  नवविधा भक्तीच्या मार्गाने परम शक्तीच्या समीप जाऊन मोक्ष मार्गाची वाट धरतो आणि या वाटचालित परम् शक्ति आणि शरीराअंतर्गत स्थित आत्मा  यांचा माऊली आणि लेक या स्वरुपात समाधि अवस्थेत  नवरात्रीनिमित्त होणारा संवाद जात्यावरिल ओवी स्वरुपात  लिहिण्याचा  प्रयत्न केलाय . गोड़ मानून घ्यावा.

आई तुला लेकराची
काळजी आहे साची
म्हणून या आत्म्याची
हाक तुज ऐकू यावी

तूच माझी मायबाप
तूच माझे खरे रूप
तूच माझी जाण हाक
ओळखून माझे दुःख

माझ लेकरु ग तूच
दिले भौतिक स्वरूप
विसरली ओळखिस
घेता जन्म या धरेस

तुज दिले अणुरूपी
ब्रम्हमय आत्मायनी
होण्या परिपूर्ण ज्ञानी
योग याग या मार्गानी

आई तूच मोहमाया
रचियली वाटे माझ्या
कसे येणे वाटे तुझ्या
दाव  मोक्ष मिळण्या

तुज भावसागरात
धाडियले घे ध्यानात
मूळ भेट स्वरुपात
प्राप्त हो तू मोक्षास

आई हाच तिढा आहे
परिसावे कैसे व्हावे
वाटे माया तोड़ू पाहे
तुजप्रत येणे नोहे

परिसावे एक वाट
कलियुगी आहे नीट
नाम गोडी ती अवीट
स्मरे नित्य जोड़ी वीट

नाम हाच मार्ग साचा
दावी मार्ग परमेशाचा
वैखरि ही होय वाचा
मोक्ष मार्ग धरायचा

हीच शिदोरी घेऊन
जन्म जन्म हा जोडून
लक्ष साध हे साधन
येसी मोक्षी परतून

आई मार्ग दावीयेला
मुक्त आत्मा करण्याला
जाणले या गुहिताला
नमू तुझ्या चरणाला

कवन : प्रसन्न आठवले
२७/०९/२०१७