माळ नववी २०१७

आठ दिवस वेगवेगळ्या गीताचे प्रकार पाहिले. आज  आईच्या भक्तीचा एक प्रकार गोंधळ लिहिण्याचा प्रयत्न केलाय. गोड़ मानून घ्यावा.

उद्या महिषासुर संग्राम आणि निःपात याच आख्यान आणि दहावी व अंतिम माळ

अश्वीन शुद्ध नवमी
नवरात्री नववा दिवस
माळ नववी अर्पण

असुर मर्दिनी आई  भवानी गोंधळ मांडला
तुझ्या कृपेची आस धरुनी गोंधळ मांडला

कोल्हापुरी  महालक्ष्मी तू , कोल्हासूर मातला
कृपा  कराया भक्तालागी, कोल्हासूर मारला
भक्तांना आनंद जाहला गोंधळ मांडला
संसाराचा ताप हरु दे  गोंधळ मांडला
गोंधळालां यावे आई गोंधळ मांडला

पार्वती रुपी जगत जननीं तू शक्तीचा अवतार
महिमा तुझा जिव्हे नाही जगताच्या तू पार
तुझ्या भक्तीची कास धरण्या गोंधळ मांडतो.
आई पार्वती तुझ्या कृपेस्तव गोंधळ मांडतो
गोंधळाला यावे शिवमयी गोंधळ मांडतो

उमा करिते वास भूवरी भवानी तुळजापूर
रणांगणाची प्रेरणाच तू कृपाळू माय उदार
दिगंत कीर्ती तुझी सांगण्या गोंधळ मांडला
वरदहस्त हा तुझा राहू दे गोंधळ मांडला
गोंधळाला यावे भवानी गोंधळ मांडला

एक्कावनी  पीठे तुझी आई भारतभूवर  
अर्धांगि तू शंकाराची हे मस्तक चरणांवर
कलियुगी दानव मनी माजला गोंधळ मांडला
पाप हरावे दुःख सरावे गोंधळ मांडला
गोंधळाला यावे शिवाई गोंधळ मांडला

कवी: प्रसन्न आठवले
२९/०९/२०१७