श्रीरुक्मिणीस्वयंवर ८२ (विवाह सोहळा १०)

श्रीरुक्मिणी स्वयंवर ८२ (विवाहसोहळा १०)

llश्रीगणेशाय नमःll

  llश्रीमुकुंदाय नमःll     llदेवी श्रीरुक्मिणी नमोनमः ll       

    llश्रीएकनाथ महाराज कि जय ll

 

 आता लग्नविधी यथोचित सुरू झाले. प्रथम श्रीगणेश जे प्रत्यक्ष तिथे हजर होते, त्यांचे पाद्यपूजन स्वये वसुदेव भीमक आणि जगतपती कृष्णाने केलं. त्यास वस्त्रअलंकार देऊन गौरविण्यात आलं. या सन्मान आणि पूजेने प्रत्यक्ष श्रीगणराय संतुष्ट झाले आणि प्रसन्न होऊन निर्विघ्न कार्याची ग्वाही देते झाले. त्यानंतर कलश पूजन झाले. 

तदपश्चात वसुदेव अर्थात श्वसुर यांनी भीमकीचं पूजन केलं. तिला वस्त्र व अलंकार दिला. रुक्मिणी अर्थातच ते घेऊन वस्त्र अलंकार परिधान करण्यास आत गेली. ती येईपर्यंत इकडे कृष्णाचं पूजन चरणांवर जलक्षीर अभिषेक करून राजाने केले. श्रीकृष्णाला श्रीफळार्पण केले. सासर कडून मिळालेलं वस्त्र आणि अलंकार परिधान करून रुक्मिणी आली आणि तिच्या स्वरूपाने पुनः कृष्णावर मोहिनी घातली, जी साऱ्यांनी कृष्णाच्या नजरेत पाहिली. 

शुद्धमती कृष्णाला तेलवण  घेऊन आली. त्यासाठी खालील प्रकारचे लाडू शुद्धमती घेऊन आली. तिवळ्यांचे, चारोळ्याचे , खसखसीचे, अष्टदल कमळ बीजांचे , फणसाचे , बोराचे असे अनेक प्रकारचे लाडू , अनेक प्रकारच्या करंज्या व कानोले करून घेऊन शुद्धमती कृष्णाचं तेलवण करते आहे. इतक्यात पुरोहितांनी आवाज दिला की तेलवणाला इतका उशीर झाला तर मुहूर्त टळून जाईल, त्यामुळे लगोलग उरकण्यात आलं.

पुरोहितांच्या या वाक्यासरशी लगबग पुन्हा वाढली आणि सात्विकतेचा श्वेत वारू अर्थात अश्व आणला गेला त्यावर कृष्ण स्वार झाला. अष्टभावांनी दोन्ही बाजूनी तो वारू धरलेला आहे.  चारही बाजूनी अष्टवसु , श्रुतिस्मृती छत्र , पताका, चामरे रत्नजडित दंडावर घेऊन ढाळत  सोबत चालत आहेत. वाद्यांचा गजर सुरू झाला. त्यावर अष्टमहासिद्धी स्वतः नृत्य करत आहेत. जनसामान्य मोहित होऊन हे दृश्य पहात आहेत. 

ऋग्वेदासह चारही वेद स्वतः गायन करत आहेत आणि त्यांच्या गायनाने ब्रह्मांड डोलत आहे. शांती क्षमा  दया या सुवासिनी कृष्णासवेत चालत आहेत. करवली सुभद्रा , वहिनी रेवती, वसुदेव , देवकी , उग्रसेन आणि सर्वांपुढे श्रीबलराम आपापल्या रथात आरूढ होऊन वऱ्हाडात अग्रभागी आहेत. सर्व यादव नरनारी वेगवेगळ्या वाद्यांच्या गजरावर नृत्य करून कृष्ण रुक्मिणीच्या विवाह सोहळ्याचा आनंद लुटण्यास निघाले आहेत. 

यादवांचे प्रमुख पाहुणे व योद्धे यांना विशेष करून खास निवडलेले अश्व,  रथ आणि गज देऊन त्यावर बसवून वऱ्हाड निघालं.  नृत्य वादन गायन जल्लोष हर्ष अष्ट सकारात्मक  वृत्ती स्वतः जातीने हजर आहेत. त्यामुळे सर्वत्र  भारलेपण आहे आणि आता वऱ्हाड विवाहस्थळी निघालं आहे. सर्वांना आता प्रतीक्षा आहे प्रत्यक्ष विवाहाची. स्वर्गातून देव देवी यक्ष किन्नर ब्रम्हदेव कैलासेश्वर सपत्नीक आतुर आहेत लग्नाच्या

या सोहळ्याचा आनंद लुटण्यास. 

क्रमशः 

ll स्वामी जनार्दन शिष्य शब्दब्रह्म श्री एकनाथ महाराज की जय ll 

ll शुभम भवतू ll

ll वसुदेवसुतं देवं कंसचाणूरमर्दनं ll देवकी परमानंदम कृष्णम्  वंदे जगतगुरुं ll

© ®  संकल्पना व लेखन : प्रसन्न आठवले

ll श्रीकृष्णार्पणमस्तू ll

२४/०२/२०२०

९०४९३५३८०९

९९६०७६२१७९