जानकी पुनःवनवास ३१

ll ॐ गंगणपतये ll

जानकी पुनःवनवास ३१
.
इकडे भरत आपल्या मातेच्या महालाकडे निघालेला असताना  देवी जानकी दोन्ही माताना आराम करायला सांगून आपण स्वतः आपल्या महालात परत आली. तिला उत्सुकता लागली होती कि , स्वामींच आणि भ्राता भरताच क़ाय बोलण झाल असेल. क़ाय बोलण चालू असेल. भ्राता भरत म्हणजे स्वामींसाठी सर्वकाही . भ्राता लक्ष्मण म्हणजे यांची प्रत्यक्ष सावलीच . पण भ्राता भरत म्हणजे प्रतिरूप . आणि दोघे तितकेच प्रिय एकमेकांना आणि तितकेच प्रिय माता कैकईना.

आणि प्रत्यक्ष स्वामी म्हणजे मूर्तिमंत शांतता, धैर्य , बुद्धि, तप आणि तरीही क्षात्रतेज, डोळ्यात समोरच्याला मोहून टाकण्याची शक्ति, पण श्रद्धा आणि भक्ति असलेल्या माणसाला आपले सर्वस्व देण्याची तयारी, प्रसंगी धीर आणि उदात्तता यांची कारुण्यमयी मूर्त असलेले, पण प्रसंगी काळालाही थरकापायला लावण्याच सामर्थ्य असलेले. आणि हे सामर्थ्य गुरुंकडून मिळवून पुन्हा त्याच गुरुचरणी लीन असलेले. प्रत्यक्षी पाहणाऱ्याला दृष्टि सुद्धा हलवू  नये अस वाटत. शांत डोळ्यातील भाव गगनाला गवसणी घालणाऱ्या विजेलाही नतमस्तक व्ह्यायला लावतात.  गंभीर प्रकृति स्थिर आणि कुशाग्र बुद्धि, संयतपणा आणि तरीही करारी नेत्र.

अष्टसात्विक भाव,  निर्मलता यांचा उत्तम संगम, प्रत्यक्ष्
कैलासेश्वर देखील त्रिवार वंदन करण्यास उत्सुक. सावळा वर्ण  असूनही   नीलवर्णासम भासणारी प्रभा, समस्त ब्रम्हांडाची छाया असूनही त्यापार असणारे, सर्वात असूनही सर्वांहुन भिन्न. विचार आणि विकार यांच्या पलीकडे असलेले सर्वसाक्षित्व.  सत्व, रज आणि तम या त्रिगुणातीत भाव. जेंव्हा जेंव्हा मी प्रभुंबद्दल विचार करते तेंव्हा तेंव्हा फक्त हेच विचार येतात.  सर्व चराचराला व्यापुन उरलेले. क़ाय सांगू किती सांगू.प्रत्यक्ष परम पावन. हेच विचार देवीन्च्या मनात असताना अनायासे देवी जानकीच्या मुखातून शब्द बाहेर आले

साजिरे ते रूप राम नामे सर्व सुख
नीलतनय मूर्ति मजसी भासे मोहक
साजिरे ते रूप......

नेत्र लावण्य , भालही विशाल
गगनीचे तेज तैसेची वदन
सुमुख, सुरेख नासिकाग्र
भासे रूप हे श्याम सुघन

वर्णवेना प्रभा प्रवाह
साक्षी असती सहस्त्रसूर्य
चारवेद शास्त्र ऐसे ज्ञान
तरी मूर्तिमंत आहे औदार्य

अजानुबाहु मूर्त मोहवी
सोळा चंद्र शीरी ते सोहवी
राजाराम ऐसा होऊनी प्रकटे
तेज मुखावरी शोभा वाही

भवभाव नेई  तारुनिया
भवसागरी हे नेई पार
ऐसे देखिले मी स्वरूप
आहे चराचराचिया पार

आणि त्याच निजानंदात देवी जानकी समाधिस्त आहे.नेत्रातून अखंड धारा चालू आहेत, आणि लोचनांच्याही पार, आणि आत्म्याच्या जवळ माझे राम, फक्त राम आणि मी. अशी भावावस्था झालेली आहे जानकीची. ज्याचा विचार तिन्ही देव, सर्व ब्रम्हांड आणि ब्रम्हांडातील समस्त सजीव करतात ते रघुवीर माझे परमस्थान आहेत.याहूंन , त्यांच्यां चरणांहुन शुद्ध आणि मनभावन अशी कोणती गोष्ट या जगात असू शकेल अस वाटत नाही, नाहीच , असुच शकत  नाही .

ll श्रीराम श्रीराम श्रीराम ll

क्रमशः

© लेखन : प्रसन्न आठवले

जय श्रीराम