भोग आणि ईश्वर ४५३

भोग आणि ईश्वर  ४५३  (१डिसेंबर, २०२० पासून अखंड) 

पंचमहाभूतरुप देहातील पाच तत्वाचं एकत्रित अस्तित्व आणि त्यांच्या संयुक्त समिकरणातून अखंड उभं राहिलेला स्वभाव, व्यक्तित्व, देहरचना, बुद्धीची झेप, मन आणि मनाची खोली, याचा एकत्रितपणा माणूस कोण आहे, कसा आहे व काय आहे, हे ठरवतो.पण यावरसुद्धा सर्वात प्रथम प्रारब्ध अर्थात पूर्वसंचित याचा मूलतः प्रभाव असतो आणि आपल्याला या एकत्रित समिकरणातून, जे व्यक्तित्व प्राप्त झालं, त्याला घडवणं वा बिघडवणं हे आपण, पुन्हा आपल्या कर्मभाराने ठरवतो किंवा लिहितो. 

या पाच घटकातील जो घटक सर्वात प्रभावी व बलशाली आहे, तो घटक, त्या व्यक्तीचा स्वभाव, वागणूक हे सर्व ठरवतो. आता कोणता घटक जास्त प्रभावी, तेसुद्धा आपण पूर्वकर्माने ठरवत असल्यामुळे, हे पक्कं ध्यानात ठेवावं की,आज जसे आपण जगतो,वागतो वा कोणत्या गोष्टी आपल्या मनाला व बुद्धीला प्रेरित करून कर्म करवून घेतात, त्यानुसार, या जन्मातून जाताना आपण, पुढील जन्माचा आपला मनाचा आलेख लिहून ठेवतो. 

आधीच्या जन्माबद्दल, काही क्षण आपण विसरून जाऊ. पण या जन्मात जसं वागतोय किंवा जसं पुढे वागू, त्या नुसार आपला स्वभाव, वागणूक यांचा आलेख तयार होतो. हा अलेखच पुढे, मृत्यूनंतर, आपल्यासोबत, पुढील जन्मात येतो. स्वभावाला औषध नाही असं म्हणताना आपण हे विसरतो की, पंचमहाभूतातील आकाशातत्वाने युक्त मन, हे असं इंद्रिय आहे, ज्याला प्रभावित करताच, ते स्वतःसह बुद्धी व देह यांना कार्याला जुंपू शकते. 

याचं कारण की आकाश हे अग्नी, वायू , पृथ्वी व जल या चारही तत्त्वांनी सहजी युक्त होऊन, त्यानुसार आपला प्रभाव बदलू शकतं. मनाच्या या निर्गुण निराकारी रुपा मुळेच योगेश्वर श्रीकृष्ण आपलं अस्तित्व इंद्रियांमध्ये मनात आहे, हे श्रीमद्भगवद्गीतेत ठामपणे मांडतात. यामुळे स्वभावाला औषध नाही, हा पूर्णतः नकारात्मक विचार सोडून, त्याला प्रभावित करणाऱ्या, चुकीच्या घटकाला ओळखून, त्यावर काही कार्य केल्यास, स्वभावातील दोष काढून टाकता येतील. 

आपल्यावर , या पाच तत्वातील कोणत्या तत्वाचा प्रभाव जास्त आहे आणि त्यावर मात करून, योग्य ते कसं करवून घ्यायचं यावर आणि व्यक्ती व व्यक्तित्व यावर उद्याच्या भागात चिंतन करूया.अर्थातच श्वासातून नामाचं व्यक्त होणं, सुरुच ठेवू. 

भोग आणि ईश्वर भाग १  (लेख क्र १ ते ६७) व भाग २ (लेख क्र ६८ ते १३७), ही पुस्तकं उपलब्ध आहेत. आपण खाली दिलेल्या मोबाईल नंबरवर संपर्क साधून, , पुस्तक मागवू शकता.  

©® विचार व  लेखन : प्रसन्न आठवले

२६/०२/२०२२

९०४९३५३८०९ wap

९९६०७६२१७९

🕉️🕉️🕉️

श्रीकृष्ण प्रेरणा!!श्रीकृष्णार्पणमस्तू !!