गोग्रासवाडी (डोंबिवली) १५

गोग्रासवाडी (डोंबिवली) १५

दिवाळी , आठवणी, साठवणी, उत्साह, आणि मन

कायम, कायम , कायम जाताना इतकी हूर हूर लावून जातेस, जितका उत्साह वर्षभर वाट पाहण्यात घालवतो आम्ही. सर्व चारही दिवस आम्ही शोधलेला आनंद , उत्साह, जल्लोष, मजा सर्व पाचव्या दिवशी हिरावून नेतेस. अगदी लहानपणापासून बघत आलोय तुझ हेच रूप. चार दिवस खुप धमाल, नुसता आनंद आणि ......

चौथ्या दिवशी संध्याकाळीच सुरवात होते उजळणी चारही दिवसांची. अगदी पहिल्या दिवसापासून , नव्हे अगदी तयारीला  सुरवात जिथून केली तिथपासून उजळणी करायची, मनातला सर्व साठवलेला आनंद  बाहेर काढून पुन्हा बंद करून पुढील वर्षापर्यंत वापरायला ठेवायचा. किती किती गोष्टी , साध्या साध्याच त्या चार दिवसात केलेल्या, घडलेल्या, अनुभवलेल्या दडवून ठेवायच्या  मनात ,का तर त्या वर्षभर पुरवायच्यात. तू येणार नाहीस पुढल्या वर्षीपर्यन्त.

कधीतरी वर्षातून एकदाच आलेले पाहुणे, त्यांच्या येण्याची लागलेली चाहूल, त्यांच्या येण्यामुळे आलेला उत्साह, आणि त्यांच्या सोबत घालवलेले ते चारच दिवस हो फक्त चार दिवस पूर्ण वर्षातले, म्हणजेच ४भागीले ३६५  किती व्यस्त प्रमाण आहे . पण हा आनंद पुरवायचाय याच व्यस्त गुणोत्तराने, पुढे थोड़ा थोड़ा रोज चाखत, अगदी आईने लहानपणी दिलेल्या पाव चमचा मधासारखा.

किती स्वप्न बघायचो लहान असताना, की या चार दिवसात हे करू , ते करू, अस होईल, तस होईल, आणि नन्तर , नन्तरचे दिवस जातात जे नाही घडू शकलं वा राहिलं त्यांचेच हिशोब मनात मांडण्यात. आणि शोधण्यात आनंदाचे काही क्षण. काही सापडतात ,काही निसटून जातात. काहीच उरतात हातात, ओजळीत  आणि मनात.

आणि पुन्हा सुरू होत, रूटीन नामक रहाट गाडग जगात जगण्यासाठी.  पुन्हा मागे पडतात त्या आठवणी चार दिवसांच्या. पुन्हा मनाला रमवाव लागत, तुला नाही कळणार ते, कारण तू येणार चार दिवस आनंद देणार. तुला वाटत आम्ही विसरणार , या ज़गाच्या पसार्यात, तुला, तू दिलेल्या आनंदाला , उभारिला. नाही होत अस, लहानपणापासून गेलेल्या , साजऱ्या केलेल्या प्रत्येक हो हो प्रत्येक दिवाळीच्या आठवणी अजुन टिकवून आहोत मनात.

आणि तरीही पुन्हा नवरात्री संपली की तुझे वेध सुरु होणार आणि आम्ही अजुन उत्साहात तुझ स्वागत करणार. तसच , आणि पुन्हा साठवणार आठवणी पुढच्या दिवाळी पर्यन्त.

© लेखन : प्रसन्न आठवले
२३/१०/२०१७
०७:३८
९०४९३५३८०९

९९६०७६२१७९