गीत - ऊठ महागणपती १

गीत - ऊठ महागणपती १ 

तुझ्या कांतिसम रक्तपताका पूर्वदिशी फडकती
अरुण उगवला, प्रभात झाली, ऊठ महागणपती ll धृ ll

सूर्याआधी दर्शन घ्यावे तुझे मूषकध्वजा
सुभद सुमंगल सर्वाआधी तुझी पाद्यपूजा
छेडुनि वीणा जागविते तुज सरस्वती भगवती ll १ ll

आवडती तुज म्हणुनि आणिली रक्तवर्ण कमळे
पांचमण्याच्या किरणांसम ही हिरवी दुर्वादळे
उभ्या ठाकल्या चवदा विद्या घेउनिया आरती ll ३ ll

शुर्पकर्णका, ऊठ गजमुखा, उठी रे मोरेश्वरा
तिन्ही जगांचा तुच नियंता, विश्वासी आसरा
तुझ्या दर्शना अधीर देवा हर, ब्रम्हा,  श्रीपती ll ४ ll 

गीत - ग. दि. माडगूळकर, संगीत - स्नेहल भाटकर
स्वर - सुमन कल्याणपूर, चित्रपट :  अन्नपूर्णा , राग : भूप देसकार 

ओम् नमोजी आद्या , वेदप्रतिपाद्या , जय जय स्वसंवेद्या आत्मरूपा ll देवा तूचि गणेशु , सकल मती प्रकाशु, , म्हणे निवृत्तीदासू अवधारिजो जी ll 

संतश्रेष्ठ ज्ञानोबा माऊली ज्ञानेश्वरीच्या सुरवातीला आद्यपूजेचा, अग्रपूजेचा मान असलेल्या श्रीगजानन अर्थातच सर्वांचा लाडका , जो देव या संज्ञेपलीकडे आहे, म्हणजेच ज्याचं स्थान विश्वाचीसुद्धा आधी आहे आणि विशेष करून जो मराठी हृदयाच्या सर्वात जवळ आहे अश्या बाप्पाबद्दल लिहितात तेंव्हा त्या लेखणीच्या शाईला फुटलेला प्रेमाचा, भक्तीचा , आत्मीयतेचा अंकुर आणि भगवंताच्या जाणिवेचा आनंद आपल्या ह्रुदयापर्यंत पोहोचतो. कारण दहा दिवस वर्षातून एकदा तो घरी येत असल्यामुळे असलेला जिव्हाळा ही आपली अमूल्य ठेव आहे. 

अश्या विश्वरूप चैतन्यमय शक्तीबद्दल आणि विशेषकरून विद्येचा अधिष्ठाता अश्या श्रीगजाननाबद्दल लिहिताना गदिमांची लेखणी पावन, पुनीत आणि कृतकृत्य झाल्याचं जाणवतं. अन्नपूर्णा चित्रपटातील हे गीत मराठी मनाच्या अंतरात्म्यात कोरलंय. खरतर या गीताबद्दल लिहायला घेतलं त्यावेळी शब्द सापडतील का ही धास्ती होती. कारण सर्व शब्दांचा आद्य आणि कारक जो श्रीगणेश त्यांच्यावरील गीतावर लिहायचय. पण मग विचार केला की, तोच स्तुती करून घेईल स्वतःची जशी गदिमांकडून या गीतात लिहून घेतली. 

अद्भुतरम्य रसाची पखरण हिरव्यागार गवतावर व्हावी आणि त्यावर आपण पहुडावं असा काहीसा अनुभव गदिमाया गीतात आपल्याला देतात, बघूया पुढील भागापासून 

© संकल्पना व लेखन : प्रसन्न आठवले 
२९/१०/२०१८