मृदुलकरांनी छेडीत तारा १
मृदुलकरांनी छेडीत तारा
स्मरते रुप हरीचे मीरा
कमलदलापरी मिटल्या अधरी
नाम मनोहर खुलता श्रीहरी
हर्षभराने तनुलतिकेवरी
पडती अमृतधारा
कालिंदीच्या नीलजलापरी
हृदयी वाहे भक्ती हसरी
तन्मयतेच्या कुंजवनी तीरी
फुलवी प्रीत फुलोरा
सालस भोळी थोर मनाची
मीरा दासी प्रभूचरणाची
मिटल्या नयनी धुंद मनाची
रंगवी हसरी मथुरा
गीत : रमेश अणावकर
संगीत : दशरथ पुजारी
गायिका : सुमन कल्याणपूर
या गाण्याबद्दल एक गोष्ट वाचायला मिळाली कालच , अर्थात फॉरवर्ड. पण लगेच गाणं डोक्यात फिरायला लागलं. दोन चार वेळा ऐकून मन भरलं नाही. मग लिहायला बसलो, अर्थातच गाण्याचा मला भावलेला, गवसलेला भाव व मतितार्थ. बघूया कस जमतंय ते. तर गोष्ट जशी वाचली ती अशी की.
ज्येष्ठ संगीतकार वसंत प्रभू आजारी होते. त्यांना भेटायला दुसरे ज्येष्ठ संगीतकार दशरथ पुजारी गेले होते. शेजारीच गीतकार रमेश अणावकरसुद्धा बसले होते. वसंत प्रभू पुजारीना म्हणाले दशरथा आमची संगीतयात्रा आता संपली. आता राष्ट्रगीताची वेळ झाली. पण जाण्याआधी माझा हक्काचा गीतकार रमेश अणावकर याला तुझ्याकडे सोपवून जातोय, त्याच्याकडून हवरटासारखी गीतं काढून घे. दोन दिवस गेले पुजारीनी अणावकराना बोलावून घेतलं. तो काळ गदिमांचा होता. पुजारीनी त्यांना गदिमांच्या पठडीतल गाणं लिहून द्यायला सांगितलं.
दोन दिवसांनी अणावकर गीत घेऊन आले. गीत वाचत असतानाच पुजारीना चाल सुचली. एक छान गाणं तयार झालं. पण इथे एक वाद झाला कारण प्रभुंकडे लता दीदी गायच्या आणि पुजारिंकडे सुमन कल्याणपूर. अणावकर अडून बसले. पण HMV ने हा वाद सोडवून गीत सुमन ताईंच्या पदरी घातलं. आणि रसिकांना एक सुंदर अजरामर गीत मिळालं.
"मृदुल करांनी छेडीत तारा ,
स्मरते रूप हरीचे मीरा"
उत्कृष्ट शब्दरचना , अलौकिक चाल आणि अत्युत्तम लागलेला आवाज.
उद्यापासून गीताचा मला गवसलेला गर्भित अर्थ, माझ्या शब्दात.
© लेखन : प्रसन्न आठवले
१९/१०/२०१८
Comments
Post a Comment