भोग आणि ईश्वर ५७१

भोग आणि ईश्वर ५७१ (१डिसेंबर, २०२० पासून अखंड) 

  

आत बाहेर सर्व व्यापून उरलेल्या त्या ईश्वराला जाणण्या साठी मुळात कुठेही जायची खरतर आवश्यकता नाही. कारण कालच्या बादलितील त्या भांड्यात आणि उर्वरित बादलीत असलेल्या जलाप्रमाणे, ईश्वरी अंश देहाबाहेर आहे, तसाच तो आत्मरुपात, देहात सुद्धा वास करून आहेच. अर्थात त्याला बाहेर कुठे शोधण्यापेक्षा, हृदयात वस्ती करून असलेल्या आणि सर्व देहाला चैतन्य देणाऱ्या, आत्म्याला जागृत करणं, हा एकच उपाय सर्वोत्तम आहे. 

खोलात जाऊन विचार केला तर हृदयात वसलेला आत्मा ऊर्जा, बल व चैतन्य स्वरूपात संपूर्ण देहात, अर्थात प्रत्येक पेशीत, नसांमध्ये, धमन्या, रुधिर अर्थात रक्त यांमध्ये सतत फिरत आहेच. हा प्रकृतीचा, विधात्याचा, एकप्रकारे चमत्कार आहे, ज्याप्रकारे हा देह आणि त्याची रचना त्याने केली आहे. आला इतका उत्तम देह, प्रत्येक पेशीमध्ये चैतन्य, हे सर्व ईश्वराने मानवाला देताना, किमान अपेक्षा ही केली की, हा मानव, याबद्दल आपले आभार मानेल. 

तरीही ईश्वर कधीही त्या अपेक्षेने काहीही करत नाही. किंबहुना जगत निर्मिती करतेवेळी, ईश्वराने निरपेक्ष बुद्धीने, संपूर्ण ब्रम्हांड रचून, सर्व व्यवस्था स्वयंचलित पद्धतीने सुरू करून देऊन, आपण समाधिस्थ झाला. अर्थात, अपेक्षा ही होती की, या जगतातील सर्व व्यवहार, नित्य, सुरळीत आणि उत्तम प्रकारे चालतील. कशाही गोष्टीत, कोणालाही त्रास होणार नाही. 

परंतु विश्व निर्मिती करताना, स्वयंचलित व्यवस्था निर्माण करण्याच्या व मानवाला या जगतात गुंतवून ठेवायच्या दीर्घ कालीन उद्देशाने, माया नावाची अदृश्य पण संपूर्ण जगताला व्यापून, जगताला आपल्या तालाने चालवणारी, एक व्यवस्था, ईश्वराने निर्माण केली. या मायेने, प्रत्येक जीवाचं जन्म ते मृत्यू, असं जीवन व्यापून टाकलं. या मायेच्या प्रभावात, जीव अनेक प्रकारच्या आसक्ती, प्रलोभने, मोह, मद, गर्व, अपेक्षा, वासना, क्रोध इत्यादी वेगवेगळ्या भावांनी, घेरला गेलेला असतो 

किंबहुना संपूर्ण आयुष्य काही मिळवणं, मिळवलेलं टिकवणं, याचं प्रपंचात, मायेच्या प्रभावामुळे, गुरफटून राहतो. यातून तयार होणारी कर्माबंधनं, जीवाला बद्ध करतात. म्हणजे सरतेशेवटी, जीवाला मायच, व्याप्त, ग्रस्त व त्रस्त करते. किंबहुना मायेचा अभाव असलेली एकही जागा या जगतात नाही. चेतनाहीन देह हेच मायेचा अभाव असलेले एक ठिकाण आहे. पण मायाराहित होता येणं शक्य आहे का. किंवा अशी स्थिती ही शक्य आहे का. यावर उद्या चर्चा करूया. पण तोपर्यंत, त्याचं सर्वव्यापी ईश्वराचं स्मरण करत राहूया. 

भोग आणि ईश्वर भाग १ (लेख क्र १ ते ६७) व भाग २ (लेख क्र ६८ ते १३७), ही पुस्तकं उपलब्ध आहेत. आपण खाली दिलेल्या मोबाईल नंबरवर संपर्क साधून, , पुस्तक मागवू शकता.  

©® विचार व लेखन : प्रसन्न आठवले

२४/०६/२०२२

९०४९३५३८०९ wap

९९६०७६२१७९

🕉️🕉️🕉️

श्रीकृष्ण प्रेरणा!!श्रीकृष्णार्पणमस्तू !!