भोग आणि ईश्वर २६५

भोग आणि ईश्वर  २६५

विश्वाच्या रचनेचे गूढ खरतर त्याचक्षणी उलगडलं, ज्यावेळी सर्व सृष्टीची रचना समजली. कारण इतकी गणितीय नियमात्मक, प्रमेयात्मक, कलाकौशल्याने युक्त, सजीव, अखंड प्रवाही अद्वितीय रचना ज्याने केली, तो स्वतः नक्कीच सर्वज्ञ व सर्वशक्तिमान असणार. हे तर्कयुक्त आणि तर्कसंगत आहे की, अश्या रचनेचा शिल्पकार कुशल आणि निपुण असणार हे नक्कीच. मुळात इथे त्रिमितीय जगतवर्तुळात राहून, बहुमिती जगताची कल्पना करणं हे बुद्धी पलीकडील आहे. 

आपण प्रत्येक गोष्टीकडे कार्यकारण भाव धरून आणि शास्त्राची परिमाणं लावून बघतो. ते या जगतासाठी योग्य आहे. कारण या जगताच्या रचजेचा पाया तोच आहे. पण बहुमिती जगतातील तत्व, विचार व नियम कदाचित वेगळेच असतील. म्हणूनच आपल्या परिमाणात त्या विश्वनिर्मात्याला मोजू पाहणं हाच मुळात तर्कहीन विचार आहे. महाभारतातील मुचकुंद राजाची गोष्ट आपण वाचली आहेच. जो देवासुर संग्रामात देवांच्या बाजूने लढण्यासाठी स्वर्गात युद्धाला गेला होता. स्वर्गातील कालमाना नुसार तिकडे एक वर्ष पूर्ण झालं, युद्ध संपायला. 

राजा मुचकुंद ज्यावेळी परत पृथ्वीवर येण्यासाठी निघाला, तेंव्हा देवेन्द्राने राजाला माहिती दिली की, एक वर्ष हा येथील कालावधी आहे, पण पृथ्वीवर साधारण हजार वर्षांचा काळ लोटला आहे. त्यामुळे मधल्या काळात त्याच्या अनेक पिढ्या राज्य करून, पृथ्वीवर त्याच्या व इतर राज्यांच्या संदर्भात अनेक भौगोलिक बदल झाले आहेत. पुढे याच राजाचा उपयोग करून भगवान श्रीकृष्ण यांनी कालयवनाला संपवलं. असो. 

एक गोष्ट नक्की, व्यासांनी जे जे लिहिलं, त्यामागे प्रत्यक्ष श्रीविष्णूंची प्रेरणा आणि शक्ती आहे. कारण श्रीविष्णुसहस्र नामात म्हटलं आहे त्याप्रमाणे, " व्यासाय विष्णुरूपाय, व्यास रूपाय विष्णवे". म्हणजेच त्यामागे तथ्यांश नक्कीच असणार. 

म्हणजेच तिथली कालगणना, परिमाणं, मिती, शास्त्र, प्रमेये हे सर्व भिन्न असणार. अश्या बहुविध जगतात असलेला आत्मा, श्रीमहाविष्णू संकल्पाने, या त्रिमिती जगतात येतो आणि येथील नियमात बांधला जातो. यात एक गोष्ट अशी आहे की, या त्रिमिती व शास्त्रयुक्त नियमबद्ध जगतातून, बाहेर पडण्याचा नक्कीच काहीतरी गुह्य मार्ग असणार. तो मार्ग मानवी मनातून जातो. 

म्हणजे असं की, या जगतातील नियमाच्या कसोट्या सांभाळत, मनाला या सर्व परिमाणातून बाहेर काढून, बहुमिती जगतातील वाट शोधण्याचं व त्या जगात जाण्याचं गुह्य ज्ञान, मनाला प्राप्त होऊ शकतं. मन हे एकच माध्यम आहे ज्यायोगे हे अवघड शिवधनुष्य पेलता येऊ शकतं. त्यायोगे या देही स्थित आत्मा, या त्रिमिती जगतातून पार जाऊ शकतो. मनाची तयारी, ऊर्जा, बल, क्षमता हे सर्व अनंत आहे.  त्या सर्व क्षमतांचा सदुपयोग करून त्याला या कार्यार्थ सिद्ध करण्याचे अनेक उपाय, विश्वनिर्मात्या च्याच कृपेने ऋषींनी, सिद्धपुरुषांनी आपल्या हातात दिले आहेत. 

याचा विचार उद्या करूया. मनाची ही अपरिमित ऊर्जा आणि चैतन्य यांना उद्दीपित करण्याच्या मार्गाचा व त्याच्या शक्तीचा विचार करा. पण नाम घ्या आणि सिद्धतेकडे जात रहा. 

भाग २ ची नोंदणी आजच सुरू केली आहे. ३० ऑगस्ट रोजी पुस्तक प्रकाशित होईल आणि त्यानंतर लगेच कुरियर होईल. प्रकाशनपूर्व सवलत रु.१४०/- (रु.११०+ रु.३०). 9960762179 Gpay, आणि Payphone 9960762179@ybl. भाग १ व २ एकत्र  रु.२५०/- कुरियरसह. यात लेख क्र ६८ ते  १३६ पर्यंत लेख आहेत. 

लेख क्रमांक १ ते ६७ संकलित करून तयार करण्यात आलेलं  भोग आणि ईश्वर भाग १ हे  पुस्तक प्रथम आवृत्ती थोड्याच प्रति शिल्लक आहेत.  श्रीरामरक्षा आणि श्रीमारुतीस्तोत्र भावार्थ पुस्तक नोंदणी साठी सुध्दा संपर्क करू शकता. काही अपरिहार्य कारणांमुळे पुस्तक छपाईचं काम लांबलं. पण लवकरच हे पूर्ण होईल. 

भोग आणि ईश्वर या मालिकेचा यू ट्यूब चॅनेल सुरू केला आहे. या मालिकेचे पहिले पंधरा लेख श्राव्य माध्यमातून चॅनेलवर, दिले आहेत.  भोग आणि ईश्वर या नावाने आपण मराठीत यू ट्यूबवर शोधू शकता, चॅनेल मिळेल. तो ऐका. 

. 

©® विचार व  लेखन : प्रसन्न आठवले

२२/०८/२०२१

९०४९३५३८०९ wap

९९६०७६२१७९