राम अनुज भरत भाग १४

राम अनुज भरत भाग १४

श्रीराम जयराम जय जयराम!! 

श्रीराम राम भरताग्रज राम राम !!! 

©® संकल्पना, संकलन आणि लेखन : प्रसन्न आठवले.

इतर छोट्या व मध्यम नौकेत, राजकुमार भरत, शत्रुघ्न, आर्यसुमंत एका नौकेत, इतर मंत्रीगण बाकीच्या अनेक नोकांमधुन वेगवेगळे जाण्यास निघाले. हे सर्व बसल्यावर, भरलेल्या, छोट्या, मध्यम व मोठ्या नौका,पलीकडील किनाऱ्यावर जाण्यासाठी निघाले. अश्याप्रकरे काही फेऱ्यांमधून, सर्व सैन्य, राज परिवार व सर्व प्रजाजन पलीकडील तीरावर पोचले. 

त्यांना तिकडे सोडावयास गेलेल्या गुह आणि त्याच्या विश्वासू साथीदारांनी, साश्रू नयनांनी निरोप घेतला. गुहाचे दोन्ही हात आपल्या हातात घेऊन, भरताने त्याला एक आलिंगन दिले आणि आपल्या हृदयाशी धरले. साश्रू नयनांनी भरत गुहाला म्हणाला

" निषाद राज आपण याचं हातानी माझे पूजनीय ज्येष्ठ भ्राता श्रीराम याना या तीरावर आणून सुखरूप सोडलत. आपले हे उपकार अयोध्या, रघुकुल आणि व्यक्तिशः मी व ज्येष्ठ भ्राता आजन्म विसरू शकणार नाही. आपण अजून एक महत्कार्य माझ्यासाठी करावं." 

गुहांच्या नयनात सुद्धा अश्रुधारा आल्या होत्या. तश्याच डबडबलेल्या स्वरात, आपल्या घनगंभीर वाणीत गुह म्हणाला

" आपण उपकार शब्दप्रयोग करून, आम्हाला लाजवत आहात. स्वामींना घेऊन जाणं हा आमचा धर्म आहे आणि आम्ही फक्त धर्मपालन केलं. आपली जी आज्ञा आहे, ती सांगावी, प्राण मागितलेेत तर तेदेखील अवघी निषाद प्रजा, आपल्या सारख्या पुण्यात्म्यांसाठी हसत हसत देईल. आपण फक्त आज्ञा करावी." 

इतकं बोलून निषादाने, भरताचे चरण धरले. त्याला खांद्याला धरून उठवत, भरत म्हणाला की,

" आपण , काशी विश्वेश्वराला प्रार्थना करावी की, त्यांच्या कृपेने, प्रभूंना परत आणण्यात मला यश येवो. श्री कैलाश नाथ, भ्राताश्रींना योग्य ते करण्याची सुबुद्धी देतील आणि ते माझी विनवणी ऐकून,पुन्हा अयोध्या येऊन राज्य कारभार हाती घेतली. अजून एक आज्ञा आहे निषाद राज, आपणही आमच्या सोबत, भ्राता श्रींना घेऊन येण्यास, चालावं. " 

गूहानें, आपले दोन्ही हात जोडून, अश्रूमय नेत्रांनी याचा स्वीकार केला आणि भरत वळून, आपल्यासाठी असलेल्या पालखीत बसला. सर्व राजमाता, स्नूषा आणि इतर राजपरिवार हे आपल्या आपल्या रथात स्थिरावले. भरताच्या विनंतीचा स्वीकार करून अर्थातच,निषादराज, आपल्या सोबत निवडक सैन्य, आपल्या परिवाराला घेऊन, निघाले. त्यांनाही एक स्वतंत्र रथ, अश्व व्यवस्था करून देण्यात आली. आता सर्व प्रस्थानास तयार आहेत, याची खातरजमा सुमंत यांच्याकडून मिळाल्यावर, भरताने सर्वांना भारद्वाज मुनींच्या आश्रमाकडे, प्रयागच्या दिशेने कूच करण्याची आज्ञा दिली. 

भरताच्या आज्ञेला प्रमाण मानून सुमंतांनी, सर्वांना प्रस्थान करण्याची सूचना केली आणि सर्व रथ, गज, अश्वदळ, पायदळ व या सर्वांच्या सुरक्षेत, सोबत आलेले, अयोध्येचे प्रजाजन शंख,वाद्य, भेरी, तुतारी, ललकाऱ्या, राजकुमार श्रीराम, देवी सीता, लक्षण, भरत व शत्रुघ्न यांचा जयजय कार करत, निघाले. या जयजयकाराचा ध्वनी आणि त्याचा साद प्रतिसाद आसमंतात घुमत होता. जणूकी स्वर्गातील सुरवरांना हा निनाद कानी पडत होता. 

मजल दरमजल करत मार्गात विश्रांती आणि न्याहारी व भोजन यांसाठी मुक्काम करत, ही रामनामाचा गजर करणारी भक्ती रसाची निष्पत्ती करणारी, भूलोकी वैकुंठ निर्माण करणारी, सर्व भाव एक केलेली आणि एकाकार यात्रा, प्रयाग क्षेत्री, भारद्वाज मुनींच्या आश्रमाच्या परिसरा जवळ येऊन पोचली. 

श्रीराम जयराम जय जयराम!! 

श्रीराम राम भरताग्रज राम राम !!! 

ही लेखमाला कॉपी राईट नोंदणीकृत आहे. त्यामुळे तिचा प्रसार व प्रचार नावासकट करावा, ही नम्र विनंती. 

©® संकल्पना, संकलन आणि लेखन : प्रसन्न आठवले

२२/०६/२०२३

9049353809

9960762179