भोग आणि ईश्वर ५०२

भोग आणि ईश्वर  ५०२  (१डिसेंबर, २०२० पासून अखंड) 

     . 

ईश्वर हा, म्हटलं तर चराचरात आहे, म्हटलं तर जगताच्या पार आहे, असं आपण अनेकदा वाचलं असेल. त्याचा अर्थ खोलात जाणून घेऊया.हे जगत निर्मिलं ते, ईश्वराच्या नाभीकमळातून जमलेल्या ब्रम्हदेव यांनी. सप्तलोक, सप्तपाताळ, सप्तस्वर्ग असे तीन लोक निर्माण करून, श्रीजगदीश्वर यांच्या मनोसंकल्पाचं रूपांतरण सत्यात आणलं. पण हे सत्यात आलेलं जगत शेवटी कधीतरी नष्ट होणार आणि पुन्हा नवनिर्मिती होणार. अर्थात आपल्या परिमाणात त्याला कित्येक कोटी वर्ष किंवा कित्येक युगं लोटणार. 

म्हणजे आपल्या दृष्टीने ते वास्तव आहे. कारण आपण आहोत देहधारी जीव. देहधारी जीवांना अनेक मर्यादांचं बंधन आणि सीमा आहेत. मुख्य सीमा आहे ती जन्माची. म्हणजे ज्या जन्मात आपण आहोत, त्याच जन्माचं आपल्याला जास्तीतजास्त स्मरण होतं किंवा राहातं. त्यातही देहाच्या तीन अवस्थांचं बंधन आहेच. म्हणजे जे बालपणी असेल ते तरुणपणी नसेल, जे तरुणपणी असेल ते वृद्धअवस्थेत नसेल. म्हणजे मर्यादा हा एक प्रकारे शाप दिलाय असं म्हटलं तरी चालेल. 

अजून एक मर्यादा म्हणजे माया व षड्रिपु यांचं ग्रासणं. म्हणजे मनाला मोहाचा शाप बुद्धी आणि देह यांना त्या मनाच्या मोहात अडकण्याचं बंधन. या तिन्हींची एकता साधून, मुक्ती वा मोक्ष यांचा मार्ग शोधता येईल, हे वरदान. पण देहाच्या गरजा बुद्धीच्या गरजा आणि मनाच्या अपेक्षा यांचा फास. बरं या फासातून बाहेर पडण्यासाठी काही करायला सुचावं, तर प्रपंचाची बंधनं आड येतात. बरं जीवनाचा अर्थ समजून येण्यासाठी, सुख आणि दुःखं यांना उपभोगून वा भोगून पुढे जाणं हे जीवनाचं वास्तव आहे. 

कारण ते पूर्वकर्माचं फलरूप आहे. बरं कर्म न करता राहायचं तर ते अशक्य, कारण जे करू किंवा न करू ते कर्म. म्हणजे काहीही केलं किंवा न केलं तरी, फलरुपात त्याचा हिस्सा पुढे येणारच. टाळून जाणं अशक्य. बरं  भोग वा दुःखं, हे तर पाहुण्यासारखे कधी येतील हे कळणार देखील नाही. आयुष्याची मजा घेत जगावं, तर त्या मजेचा परिणाम पुढे येणारच. न मजा करता जगावं तर अशाही व्यक्ती दिसतात वा भेटतात, ज्या आयुष्यभर उपभोग घेऊनही, कधी दुःखं भोग भोगताना दिसत नाहीत. 

म्हणजे मग नक्की कोणतं कर्म श्रेष्ठ मानायचं. प्रश्न तर गहन आहे. बरवाईट कर्म न करता राहावं, असं मनाला समजावून सांगितलं, तर अश्या व्यक्तिसुद्धा दिसतात किंवा बघायला मिळतात, ज्या आयुष्यभर सरळ आयुष्य जगतात, पण एकही दिवस सुखाचा साजरा करू शकत नाहीत. वर्षानुवर्षे त्यांचा लढा सुरू असतो. 

आपण स्वतःही यातून जात असलो, तर हे प्रश्न जास्तच त्रास देतात. या आणि अश्याच प्रश्नांचा मागोवा घेऊया, पुढील भागात. 

भोग आणि ईश्वर भाग १  (लेख क्र १ ते ६७) व भाग २ (लेख क्र ६८ ते १३७), ही पुस्तकं उपलब्ध आहेत. आपण खाली दिलेल्या मोबाईल नंबरवर संपर्क साधून, , पुस्तक मागवू शकता.  

©® विचार व  लेखन : प्रसन्न आठवले

१६/०४/२०२२

९०४९३५३८०९ wap

९९६०७६२१७९

🕉️🕉️🕉️

श्रीकृष्ण प्रेरणा!!श्रीकृष्णार्पणमस्तू !!