भोग आणि ईश्वर ४५९

भोग आणि ईश्वर  ४५९  (१डिसेंबर, २०२० पासून अखंड) 

वायूत्वावर आधारित देहरचना प्राप्त जीव चंचल आणि बदलत्या मतांचा असतो. त्यामुळे अश्या व्यक्तीला सर्वात प्रथम त्याची चंचलता सोडून,शांतता स्वीकारण्याचा सराव करावा लागेल. यासाठी, सुरवातीला, दिवसातून ठराविक वेळ निवडून, काही क्षण शांत बसून राहण्याचा सराव करावा लागेल. अश्यावेळी काही जप, मनन वा चिंतन सुद्धा न करता, फक्त निर्विचारी व स्थिर होण्याची सवय मुद्दामहून लावून घेण्याचा सराव करणं क्रमप्राप्त आहे. 

कारण अश्या व्यक्तीला सुरवातीलाच काही विचार वा नाम वा तत्सम काही करावयास दिलं तर, त्यातही त्या व्यक्तीची चंचलता आड येऊन, एका विचारातून, दुसऱ्या विचारात आणि एक नाम वा जाप यातून, संभ्रमावस्थेत येऊन, हे करू की ते, असा गोंधळ होऊ शकतो. म्हणजे चंचल स्वभावाच्या व्यक्तीला एकतर काहीच पटत नाही किंवा सर्वच पटतं. पण त्यामुळे निश्चित मत वा विचार मनात ठाम राहात नाही. 

याचसाठी फक्त बैठकीचा सराव खूप महत्वाचा आहे. अश्या वेळी अश्या प्रयत्नात, देह, बुद्धी व मन हे तिन्ही घटक, स्थिर होणं महत्वाचं आहे. कारण अश्या चंचल व्यक्तीची बुद्धी, मन आणि देह हे तिन्ही, चंचल असतात वा असू शकतात. असा स्थिर बसून निर्विचारी होण्याचा सराव वा तसा प्रयत्न काही काळ करताना, सुरवातीला, अनेक अडथळे,अडचणी, गोंधळ, गडबड होऊन, त्याद्वारे मनाची व बुद्धीची प्रचंड अस्वस्थता होऊ शकते. 

याव्यतिरिक्त, कोणत्या वयात हे प्रयत्न वा हा सराव आपण करतो आहोत, त्याचाही परिणाम, लवकर किंवा उशिरा, चित्ताला स्थिरता प्राप्त होण्यावर, होऊ शकतो. यामध्ये सर्वात महत्वाचा घटक जो अश्या लोकांमध्ये कमी असतो किंवा पूर्णतः नसतो, तो म्हणजे इच्छाशक्ती. इच्छा शक्ती ही मनाच्या ऊर्जा व एकाग्रता यांचं प्रतीक आहे. पण या लोकांबाबत मुळातच एकाग्रतेचा अभाव असल्या मुळे, मनात निर्माण होणाऱ्या प्रत्येक इच्छेमागे, कार्यरत  ऊर्जा ही निश्चितच कमी किंवा शून्य असते. 

त्यामुळे स्थिरता जसजशी प्राप्त होत जाईल व दृढ होत जाईल, तसतशी इच्छा, ऊर्जा आणि त्याबरोबर बल किंवा शक्ती,हळूहळू वाढत जाऊन,एकाग्रतेला आवश्यक बैठक तयार होऊ शकते. अर्थात हेसुद्धा मनाच्या स्थिर, शांत व विचारी होण्यावर अवलंबून आहे. म्हणून वायूत्वाने युक्त व्यक्तींना बैठक व स्थिरता यांचा , सुरवातीला, सराव करणं गरजेचं आहे. 

जलतत्व व वायुतत्व यांनी युक्त व्यक्तींनी मनाची ऊर्जा व शक्ती यासाठी काय करावं, हे आपण पाहिलं. त्यासाठी आवश्यक सराव व प्रयास आपण करतच राहू. पण तो पर्यंत आपण नामाने साधणाऱ्या अनेक लाभांचा अनुभव घेतच राहूया.

भोग आणि ईश्वर भाग १  (लेख क्र १ ते ६७) व भाग २ (लेख क्र ६८ ते १३७), ही पुस्तकं उपलब्ध आहेत. आपण खाली दिलेल्या मोबाईल नंबरवर संपर्क साधून, , पुस्तक मागवू शकता.  

©® विचार व  लेखन : प्रसन्न आठवले

०४/०३/२०२२

९०४९३५३८०९ wap

९९६०७६२१७९

🕉️🕉️🕉️

श्रीकृष्ण प्रेरणा!!श्रीकृष्णार्पणमस्तू !!