नवरात्री २०१९ माळ १

नवरात्री २०१९ निमित्त नऊ काव्य माळांचा संकल्प.आज प्रथम माळ. आई शैलपुत्री कथा आणि स्तुतिगीत.

वन्दे वांच्छितलाभाय चंद्रार्धकृतशेखराम्‌ ।
वृषारूढ़ां शूलधरां शैलपुत्रीं यशस्विनीम्‌ ॥

आई शैलपुत्री हे नवरात्रात पुजले जाणारे देवीचे प्रथम रूप।आहे. देवीचं वाहन वृषभ आहे. म्हणूनच देवीला वृषारूढा या नावाने देखील ओळखतात. देवीच्या उजव्या हातात त्रिशुळ व डाव्या हातात कमळ आहे. याची कथा थोडक्यात अशी.

एकदा दक्ष प्रजापती यांनी यज्ञ करण्याचे ठरवले. त्यावेळी समस्त देवी देवता यांना पाचारण केले. परंतु भगवान शंकर व देवी सती यांना बोलवण्यात आलं नाही. देवी सतीची इच्छा होती की आपल्या माहेरी संपन्न होत असलेल्या या यज्ञात सहभागी व्हावं. शिवानी तिला समजावून पाहिलं. पण तिची तीव्र इच्छा पाहून जाण्याची अनुमती दिली.

अर्थातच भगवान शिवशंकरांनी म्हटल्या प्रमाणे तिथे देवी सतीचं स्वागत न होता अपमान मात्र झाला. तिच्यासह पती भगवान शंकर यांचा देखील अपमान झाला जो देवीला सहन झाला नाही आणि क्रोधवश योगाग्नी निर्माण  करून त्यात देवीने उडी घेऊन स्वतःला अग्नीच्या स्वाधीन केलं.

अर्थातच भगवान शंकरांनी ही वार्ता कानी येताच प्रजापतीच्या यज्ञात जाऊन यज्ञाचा विध्वंस केला. हीच सती नंतर हिमालयाच्या घरी जन्म घेऊन शैलपुत्री नावाने प्रसिद्ध झाली. देवी साक्षात शक्तीचं रूप म्हणून ओळखली जाते. देवी शैलपुत्रीची कथा वाचल्यानंतर देवीच्या प्रार्थनेस्तव एक रचना नवरात्रातील पहिली माळ.

आई शैलपुत्री देवी तुझी आरती करतो
पावसी तू भक्तालागीं गुणगान मी करतो

भक्त गांजलेत फार
कष्ट जाहले अपार
कलियुगी आई थोर
तुझा महिमा अपार
तुझ्या कृपेसाठी आई नऊ रात्री जागवतो
आई शैलपुत्री देवी तुझी आरती करतो

तुझे रूप हे अद्भुत
दैत्य होती भयभीत
त्रिशुळ तुझे हातात
दुष्ट शक्ती दूर जात
खल रणी तू मारसी हे ब्रीद मी जाणतो
आई शैलपुत्री देवी तुझी आरती करतो

तू अष्टसिद्धी दायी
या लेकरांची आई
भक्तांचे दुःख पाही
निवारणा धावून येई
नवरात्री नऊ माळा आज सुरू मी करतो
आई शैलपुत्री देवी तुझी आरती करतो

प्रसन्न होसी तू देवी
चिंतामणीसुत विनवी
आठवले शब्द ठेवी
गोड मानून यश दावी
सिद्धी कार्या नेसी, शुद्ध भावे मी भजतो
आई शैलपुत्री देवी तुझी आरती करतो

©® कवी : प्रसन्न आठवले
२९/०९/२०१९
माळ प्रथम अर्पण !!!  🚩🚩🚩🌷🌷🌷