ll श्रीमहाविष्णुस्तुती ll

🌷🌷🚩ll श्रीमहाविष्णूस्तुती ll 🚩🌷🌷

मकरंद जया रंध्रात पूर्ण, त्या कमळांचा तुज हार

पुष्पे, परिमळ दिव्य जयांचा, वाहियली चरणांवर

कल्पनातीत शक्ती अजोड ती गदा, एका हाती

एका नादाने विश्व हादरे तो पांचजन्य दुज हाती

रिपू खंड खंड उध्वस्त होय, ते सुदर्शन त्रिज हाती

त्या कमलनयन श्रीलक्ष्मीसम कमलपुष्प तव हाती

अशी चतुर्भुजा ही मूर्त साजिरी  तेज नेत्री अलोट

गंधर्व सर्व गाती भूपाळी प्रतिदिनी होऊनी भाट

सूर लक्ष लक्ष वाहती पखाली तव नामाच्या  देवा

क्षीरसागरात करी वास तरी जगत तुझ्या निजभावा

नभी कोटी कोटी तारका प्रकाशित तुझेच वाहती तेज

रवी चंद्र, जयाने दिवस रात्र, ते दिपतील पाहून ओज

अजानुबाहु मूर्त तुझी अन वर्ण निळसर नभ हे 

प्रतिबिंबित सारे संकल्पात प्रकटले क्षणात जग हे

मुख चंद्र तुझा पाहण्यास आतुर भक्त उभा हा द्वारी

सावली तुझ्या कृपेची असुदे प्रसन्न साधक हा वारी

©® कवी : प्रसन्न आठवले

१४/१२/२०१९

१०:०९