जानकी पुनःवनवास ४१

ll ॐ गंगणपतये ll

जानकी पुनःवनवास ४१

मनापासून आणि मनाच समाधान होईपर्यंत तेल व उटण लावल्यावर मग भगवंतानी स्वहस्ते भरताला व लक्ष्मण याना उभ करून स्नानासाठी स्नानगृहाकडे प्रस्थान केल. दोघानाही हाताला धरून राजप्रसादा तील स्नानगृहात प्रवेश केला. स्वतःच्या हातानी प्रभुनी उन्हपाणी सारख केल. हा प्रकार सर्व सेवकवर्ग विस्मयकारकपणे बघत होते, मोठ्या आचंब्याने आणि अक्षरशः तोंडात बोट घालुन.

इकडे दोन्ही बंधुना स्वहस्ते मनसोक्त स्नान घालुन पूर्ण समाधानी झालेल्या प्रभुचा मुखचन्द्र हर्षाने अजून खुलून दिसतोय. जणू सहस्त्ररश्मी तेज त्यावर विराजमान आहे. भरत स्नानापश्चात प्रभुना वदला

" ज्येष्ठ भ्राता आपल्या स्नानासाठी आम्ही आता व्यवस्था करतो आपण आसनस्थ व्हाव"

अस म्हणून अनुज भ्राता भरत प्रभुना हाताला घरून चंदनाच्या सुशोभित चौरंगावर नेऊन बसवतो. अष्टगंध युक्त  दिव्यओषधी युक्त आणि सत्वयुक्त उटण्याचे सुवर्ण पात्र भरताने स्वतः हातात घेतले. प्रभु मोठ्या कौतुकाने सर्व बंधुना न्याहाळून  पहात होते. मोठा कौतुकास्पद सोहळाच तो. प्रत्यक्ष सर्वसाक्षी परम प्रभुना बन्धु भरत लक्ष्मण तेल उटण लावून स्नान घालणार हे पाहण्यासाठी सर्व भूमण्डल , ग्रहगोल , तारामंडल आणि ब्रम्हांडातील चराचर पाहण्यास उत्सुक जहाले होत.

प्रथम चौरंगावर प्रभुना बसवल्यावर भरताने प्रभुंच्या जटा सोडण्यास सुरवात करतो. प्रभु शान्तचित्ते हे मनोहारी दृश्य पहात होते. जटा सोडून झाल्यावर त्या जटाना  भरताने सुगंधयुक्त तेल लावण्यास सुरवात केली. याचाच दूसरा भाग लक्ष्मण सुद्धा नेटाने पार पाडत होता.  प्रभुंची माया प्रभुनाच मानवी देहात या दृष्याची मौज पाहण्याचा आनंद घ्यायला लावत होती.

विश्वाचा निर्माता विश्व रचनेनन्तर अलिप्त झालेल आपल अलिप्तपण विसरुन , आपल्याच निर्मिलेल्या मायेच्या अधीन राहून सर्व बंधुच्या आनंदात सहभागी झाले होते.  जटाना तेल लावून त्या नीट सोडवून घेतल्यानंतर भरताने प्रभुंचे भगवे उपरणे बाजूस काढून ठेवले. काऱण स्नानाआधी भरत व लक्ष्मण यांच्याप्रमाणेच अजूनही वनवासातून आलेल्या वस्त्रात होते.

उपरणे उतरवल्यानंतर प्रभुंच्या धष्टपुष्ट ,पिळदार  व बलदंड शरीराचे तेज चहुदिशाना सूर्याकिरणांप्रमाणे पसरले होते. अष्ट सात्विक भाव असलेल्या त्या चेहऱ्यामागची कणखरता त्या वज्रासम बाहूत सामावली होती हेच जाणवत होत.  मृगाच्या सरी पडते वेळी येणाऱ्या मेघांच्या वर्णासमान वर्ण असलेला , पण कांचना समान तेज, आणि सहस्रसूर्यासमान पसरलेली आभा असलेला तो तेजस्वी महामानवी  देह पाहण्यासाठी संपूर्ण विश्व जणू सभोवार जमा झाल होत.

ll श्रीराम श्रीराम श्रीराम ll

क्रमशः

© लेखन : प्रसन्न आठवले

जय श्रीराम