नवरात्र २०१९ माळ १० दसरा

नवरात्रीच्या नऊ दिवसाच्या नऊ माळाना दहाव्या  चंद्रकोरीच्या सजावटीचं पान अर्पण करून हा सोहळा साजरा करूया. माझ्या या काव्य प्रवासात ज्यांनी ज्यांनी माझ्या काव्याला दाद दिली त्या सर्वांचे मनःपूर्वक आभार. हा लोभ असाच निरंतर राहुद्या हीच प्रार्थना. आई दुर्गेची कृपा सर्व वाचकांवर अशीच राहो हीच तिच्या चरणी प्रार्थना करून हा विडा आईला अर्पण करतो.

असुर माजला रणी पातला
कली शस्त्र घेऊनी हा उभा
असुर भयाने त्रस्त जन हे
आई भवानी करती धावा

त्राही आई तू जगतजननी तू
तारी भयातून वारी आम्हाला
महिषासुर हा सहा रूपांनी
या जगी कली अति माजला

तव नामाचा करुनि धावा
नऊ दिसांची बांधून पूजा
नऊ दिसांची करुनि सेवा
आई चरणी वाहतो तुझ्या

मनातून हे किल्मिष सारे
नकारात्मक विचार वारे
वासनेची विखारी असुरे
पामर आम्ही तुझी लेकरे

शरण आलो तुजला आई
धावत ये ना भक्तापाई
कलीपासुनी भक्त वाचवी
ताप जगाचा आई सोडवी

लावू दारी  नाम तोरणे
वाहू तुजला फेडू पारणे
नाम ध्वजा ही हाती धरणे
नामास्मरूनी कली मारणे

आई अर्पण करतो माळ
जगताचा तू कर प्रतिपाळ
हे असुर जगीचे स्वये जाळ
कवी प्रसन्नास तूच सांभाळ

सर्व वाचकांना दसऱ्याच्या मनःपूर्वक हार्दिक शुभेच्छा

©® कवी : प्रसन्न चिंतामणी आठवले
०८/१०/२०१९
9049353809 wap