गोग्रासवाडी आणि चित्रपट गोपाळकृष्ण (१९३८).

गोग्रासवाडी आणि चित्रपट गोपाळकृष्ण  (१९३८).

गोग्रासवाडी म्हटलं की आठवतो प्रभात चित्र मंदिरचा चित्रपट "गोपाळकृष्ण". मे १४, १९३८ साली प्रदर्शित झालेल्या या चित्रपटाचा सेट प्रभात चित्र संस्था पुणे येथे उभारला होते. पण बाहेरचं म्हणजेच आऊटडोअरच चित्रण गोग्रासवाडीत झालं होतं. एक उल्लेख सापडतो की त्या काळी रेल्वे गाड्या डोंबिवलीत थांबत नसतं. म्हणून प्रभात कंपनीने स्टेशन मास्तरना विनंती करून गाडी डोंबिवली येथे थांबायला लावली.

यावर मास्तरांनी अट घातली की फत्तेलाल आणि दामले या चित्रपटाच्या दिग्दर्शकांना भेटण्याची परवानगी त्यांना मिळावी. ही अट सहज साध्य असल्यामुळे मान्य करण्यात आली. गाडी डोंबिवलीला थांबली. पुण्यावरून आलेलं पूर्ण युनिट आणि  सर्व मंडळी मग उतरली आणि गोग्रासवाडीत चित्रीकरणासाठी पोचती झाली. चित्रपटात १०० ते १५० पेक्षा जास्तं गायी व अनेक बैल वापरण्यात आलेत. ते सर्व गोग्रासवाडीतील आहेत.

या चित्रपटाचं दिग्दर्शन शेख यासीन फत्तेलाल आणि विष्णू गोविंद दामले यां प्रभातच्या भागीदारांनी केलं होतं.  ज्येष्ठ गायक राम मराठे , यांनी बालकृष्णाची भूमिका आणि शांता आपटे यांनी राधेची भूमिका केली होती. चित्रपटाला संगीत मास्टर कृष्णराव या त्याकाळच्या दिगग्ज संगीत दिग्दर्शकाने दिलेलं होतं. हा मराठी व हिंदी दोन भाषांमध्ये तयार करण्यात आला होता.

गोग्रासवाडीत अशी वदंता होती त्याकाळी, ( म्हणजे आम्ही लहान असताना सत्तरच्या दशकात की गायींना नियंत्रित करण्यासाठी गोग्रासवाडीतील एका गुराख्यालासुद्धा कृष्ण सवंगड्याची भूमिका देण्यात आलेली होती).  या चित्रपटाच्या चित्रीकरणासाठी गोग्रासवाडीची संस्थेची जी मदत घेण्यात आली होती, त्याबद्दल प्रभात चित्र संस्थेने मुंबई गोग्रास भिक्षा संस्था गोग्रासवाडीला १९३८ साली रु.२,०००/- दिले होते. आज गोग्रासवाडीत कृष्णमंदिरात गेलो होतो, त्यावेळी त्या संगमरवरावर कोरलेल्या आठवणींची प्रतिमा भ्रमणध्वनीत बंद करून आणू शकलो.

खास आपल्यासाठी या लेखसोबत देत आहे.

© माहिती संकलन व लेखन : प्रसन्न आठवले
०३/०२/२०१९