भोग आणि ईश्वर ५२२

भोग आणि ईश्वर  ५२२ (१डिसेंबर, २०२० पासून अखंड) 

स्मरणाचं एक वैशिष्ट्य आहे की, सुखात वा उत्तम काळात आपल्याला सुखोपभोग घेण्याचं स्मरण असतं किंवा विसरच नसतो. मन त्यावेळी वास्तविक उत्तम लहरींनी युक्त असतं. सकारात्मकतेने मनाचा घट काठो काठ भरलेला असतो. पण इथेच आपला खरा घात होतो. म्हणजे होतं काय की, गुंतवणुकीच्या धोरणानुसार हा काळ काही साठवण्याचा, जमवण्याचा आणि भविष्या साठी काही तरतूद करून ठेवण्याचा असतो. ते आपण व्यवस्थितपणे करतो. 

हेच नेमकं आयुष्यात वा आत्मानंदाच्या मार्गावर अग्रेसर होण्या साठीसुद्धा करण्याची आवश्यकता असते. पण आपण तेच करत नाही. किंवा त्याचंच स्मरण राहात नाही.  वास्तविकपणे प्रत्येकाला त्याच्या आयुष्यात एखादा कार्यकाळ असा येतोच, ज्यावेळी मन उल्हसित आणि प्रसन्न असतं, मनांत सकारात्मक विचार, येत असतात, येणाऱ्या कोणत्याही विचारातून नकारात्मक असेल ते, त्यागून, फक्त आणि फक्त सकारात्मक विचार घेऊन पुढे जाण्यासाठी मन सक्षम असतं, जिकडेतिकडे मनाला फक्त उल्हास आणि उत्तम विचार दिसतात. 

हा असा काळ गुंतवणूक शास्त्राप्रमाणे, पुढील काळ तसंच पुढील जन्मासाठी काही साठवून पुढे जाण्याचा काळ आहे. परिस्थिती कधी कशी येईल हे आर्थिक बाबतीत आणि आध्यात्मिक पातळीवर सांगता येत नाही  सर्व आयुष्य हे कर्माधिष्टीत असल्यामुळे आपण आज जो सुखोपभोग घेत आहोत, तो आपल्याच आधीच्या कर्मांचा परिपाक आहे. 

पण हे जाणताना दूरदृष्टीचा अभाव, जाणीवा बंद ठेवतो आणि हे लक्षातच येत नाही की, गुंतवणूक करून पडत्या काळासाठी काही चांगलं कर्म करून ठेवणं जरुरी आहे. अन्यथा सुखाच्या काळात उपभोग घेताना, चांगल्या कर्माचं संचित संपल्यानंतर येणाऱ्या भोग, दुःख या काळा साठी जर काहीच सत्कृत्य व पुण्यकर्म घडलं नसेल, तर तो पडता काळ सुसह्य होण्याऐवजी असह्य होईल. वास्तविकपणे हीच चूक जवळजवळ सर्वच जण करतात. 

उपभोग घेताना हे लक्षात येतच नाही की आपण आपल्याच पूर्वकर्मातील पुण्यकारक कर्माचं, संचितात मिळालेलं फल भोगत आहोत. त्यावेळी असा विचार असतो की, आता तर उपभोग घेऊ, पुढचं पुढे बघू. ज्यावेळी पडता काळ येतो, त्यावेळी वाटतं की, आपण सुखात होतो, आनंदात होतो, ते कोणालातरी बघवलं नाही. कोणीतरी मिठाचा खडा टाकला. पण हे ध्यानात येत नाही की, उत्तम काळात आपण नवीन पुण्यफल जोडलं नाही. उलट आपण आपल्या हिश्श्यातील पुण्य कर्माचं फलरूपात आलेलं संचित संपवलं आहे. 

यावर अजूनही चिंतन करूया, पण तोपर्यंत नामात नित्य राहण्याचा प्रयत्न करत राहूया. 

भोग आणि ईश्वर भाग १  (लेख क्र १ ते ६७) व भाग २ (लेख क्र ६८ ते १३७), ही पुस्तकं उपलब्ध आहेत. आपण खाली दिलेल्या मोबाईल नंबरवर संपर्क साधून, , पुस्तक मागवू शकता.  

©® विचार व  लेखन : प्रसन्न आठवले

०६/०५/२०२२

९०४९३५३८०९ wap

९९६०७६२१७९

🕉️🕉️🕉️

श्रीकृष्ण प्रेरणा!!श्रीकृष्णार्पणमस्तू !!