जानकी पुनःवनवास १३

ll ॐ गंगणपतये ll

जानकी पुनःवनवास १३

अयोध्या जवळ येत आहे हे पाहुन हर्षभरित झालेले सर्व , भगवान मुख़ातून अजुन काही ऐकण्यास उत्सुक झाले. हेच जाणुन प्रभु स्वयम वदते झाले

भगवान श्रीराम उवाच

प्राक्तनात जे लिहिले तुझिया
भोग भोगणे आहे रे तुज
सहस्त्र जन्मे येऊन योनि
कर्मफले बघ मिळती रे तुज

किती अडकसी कर्मगते तू
किती भोगिसी जन्मोजन्मी
तुझे तुला ना उमगत कोड़े
का रति रमसी या कर्माग्नि

कळे न काळाची गति तुजला
कळे न तुजला किती भोग हे
तुझे भोगणे संपे न कधीही
जोवर माया मोहून  राहे

लक्ष्मण उवाच

प्रभु वदावे यातून मार्गा
कैसे जड़जीव सुटती सांगा
कोण्या कर्मे भोग सुटावे
त्या मार्गाचे गुह्यही सांगा

भगवान उवाच

योग याग  अष्टादिक मार्ग
परंतु हर युगी नसेल सवडी
म्हणून एकच मार्गा वदतो
नामस्मर तू क्षणही न दवडी

मिळेल जो जो वेळ जीवाला
नामा जोडूनी करे सार्थकि
ज्या योगे हे भोग सुटावे
अंति मोक्षाची हो प्राप्ति

भोग भोगताना स्मरणे रे
सुखात ही स्मरशी नामाला
वेळ मिळे तुज पुण्य जोड़ी तू
क्षण ही न वाया स्मर नामाला

लक्ष्मण उवाच

नामाची इतुकी महती तर
कोणी कैसे केले आधी
स्पष्ट करुनी सांगावे भगवन
याला आहे क़ाय उपाधी

भगवान उवाच

असे नाम ज्या नाही उपाधी
मिथ्या नाही यांची महती
याच्या योगे तरले ईश्वर
अनेक दैत्या निर्दल करती

महेश , माधव, ब्रम्हाहि म्हण
कोणी न यावीण असे वेगळे
तिन्ही लोकी श्रेष्ठ जहाले
नामाने बघ  तरले  सगळे

नको शंकि या अवीट नामा
यावीण जगी ना तरणे कोणी
जन्मजन्मिचा खेळ थांबवी
नामा अधिकची नसेल ऊणी

लक्ष्मण उवाच

एकच पुसतो तुम्हा प्रभु मी
ज्याने केले नामा जवळी
पापे त्याची असतील कितीही
पुसुनी जातील का हो सगळी

भगवान उवाच

असेल जरी कितीही अधमी तो
कोणी पापी नर ही असे मग
नामे स्मरता आत्म्यापासून
वाल्मीकि होई वाल्या ही मग

इतुके गुह्य असे नामाचे
परंतु जाणे जो जीव येथे
पापे हरुनी भोगही संपुनी
आत्मा जाई परमात्मा जेथे

फलश्रुति :

नसेल आधी कुणीही कथीली
रामगीता म्हणुया हो याला
पारायण  करता घडते हो
रामकृपा ती अखंड त्याला

श्रीरामे इतुकी कॄपा करावी
वाचें यासी तयासी फळणे
पापांच्या राशी उतरोनि
प्रारब्धाचे भोगहि टळणे

रामाचा आशीष तयाला
जो जीव पठतो या गीतेला
अखंड सेवा प्रभुची तयाला
मोक्ष मिळे अंति आत्म्याला

ll श्रीराम श्रीराम श्रीराम ll

क्रमशः

© शब्द प्रभुंचे
लेखन : प्रसन्न आठवले
०२/०२/१८

जय श्रीराम