धुनी पेटली आहे

धुनी पेटली आहे आता स्वामीसुता अवधुता
प्राण फुंकले तयात नाथा भक्तवात्सला त्राता 

मिटता डोळे दिसले सारे जग अवघे सामोरी
कुणी न आता  उरला माझा स्वामी मज सावरी 
तुम्ही जयाला आपुला म्हटले तारी तया निर्माता 
धुनी पेटली आहे आता स्वामीसुता अवधुता

कृपा तुमची मग तारे मजला काही नको  शिदोरी 
बहु कष्टलो व्यर्थच जगलो जाणीव केली जागी
आता तरी हा देह तरु दे अंत जवळी दिसता 
धुनी पेटली आहे आता स्वामीसुता अवधुता

भोग संपले सारे शमले ऐसें होणे नाही स्वामी
तुम्हा विनवतो चुकलो  मार्गा लावा पार यातुनी
अवघड आहे जगणे माझे तारा हो अनंता 
धुनी पेटली आहे आता स्वामीसुता अवधुता

© कवी : प्रसन्न आठवले
२२/११/२०१८
१८:४९