नवरात्रात माळ चतुर्थ

नवरात्रात माळ चतुर्थ

आई अंबेच्या नावाने आज गोंधळ मांडला
कोल्हापूरची महालक्ष्मी आई  ये तू  गोंधळाला

दैत्य दैन्य ताप झाले
माणसाच्या रूपे आले
जगताच्या नाशा आले
आत्मयात प्रकट झाले
कोल्हासुर मारलास कली सर्वत्र माजला
आई अंबेच्या .....

आई जाग आता तूच
भवानी तलवार तूच
रणांगणी काली तूच
कात्यायनी रूपे तूच
आई शिवाई रुपात जागसी ग तू ब्रिदाला
आई अंबेच्या .....

तूच रेणुकामाता ग
माहुरचे भाग्य तू ग
तांदळा रुपात तू ग
भक्ती विडा घेसी तू ग
आई परशु परजता दैत्य कापे चळाचळा
आई अंबेच्या .....

सप्तशृंग गडावरी
आई वणी ग्रामांतरी
बहू हस्ते रक्षण करी
अग्निरूप धारण करी
अस्त्र शस्त्र सज्ज करी यावे जगत रक्षणाला
आई अंबेच्या .....

विंध्यवासींनी तू आई
तूच वज्रेश्वरी आई
जाग एकवीरा आई
मुंबादेवी रूप आई
महाराष्ट्राची माऊली तू दान इतुके दे  भक्ताला
आई अंबेच्या .....

प्रसन्न होसी भक्तकुळा
होसी चिंतामणी सकळा
आठवले लिही कवनाला
गोड मानून घे  शब्दाला
आई अंबेच्या .....

आई जाग जाग आता अंबे गोंधळ मांडला
स्वीकारीशी आई आता माझ्या चवथ्या माळेला

ll इति श्रीशक्तीरूपेण देवी स्तुती अर्पणमस्तू ll

© कवी : प्रसन्न आठवले
१३/१०/२०१८