अजूनही

आज सहज सुचलेलं हळुवार प्रेमकाव्य

अजूनही तू पापण्या उघडल्यास की कळ्या उमलतात
कोमेजली फुल धुंद होऊन नवगंधासह पुन्हा फुलतात
अजूनही तू ........

अजूनही उजाड माळरानावर
शहारे  येतात गवताला
पराग अजूनही संजीवन
होऊन येतात ऋतूला
अजूनसुद्धा गंध घेऊन आरक्त प्राजक्ताचे सडे पडतात
अजूनही तू ........

अजूनसुद्धा बहरलेल्या वेली
टाकतात उसासे तुझ्यासाठी
भाळल्या बागा फुलांच्या
भ्रमर शोधतात कशासाठी
अजूनही तुझ्या एका कटाक्षाने गुलाब पाकळ्या सांडतात
अजूनही तू .........

उताराला लागलेल्या संध्येला
अजून तुझाच रंग चढतो
उतरणीवर क्षितिजाआड
चंद्र अंधुक उसासे टाकतो
अजूनदेखील तारका फक्त तुलाच शोधत रात्रीत फिरतात
अजूनही तू ........

जाणतो या सर्वांचा भ्रम
विभ्रम होणार नाही
वाट बघणाऱ्या जीवाची
आस सरणार नाही
आजदेखील वाऱ्यासोबत तुझेच सूर  कानी येतात
अजूनही तू .......

© कवी : प्रसन्न आठवले
१४/१०/२०१८
१८:०७