नवरात्रात माळ प्रथम

नवरात्रात माळ प्रथम

श्रीगणेश कृपे करोनि
नवरात्र प्रथम दिनी
आई शैलपुत्री नमोनी
पारणे नऊ दिसांचे

कृपा तव या देशी
परी महाराष्ट्राशी
नाळ तुझी खाशी
साडेतीन पिठाची

तू वज्रचुडामंडित
तुज भवानी स्तवित
तुज रणांगणी सेवत
हर्षे अर्पिती रुधिर

तू आई शिवाजी
दिधला छत्रपती
स्वराज्य  हिंदवी
स्थापियले त्यांनी

तुळजापुरी वास
रणरागिणी खास
आमुचा तू विश्वास
येसी पुन्हा महाराष्ट्री

तुज स्थापियले मी
नऊ माळ कवने ही
वाहीन शब्दे करुनी
संकल्प केलासे

तरी तूच माझी आई
शारदेची तू  भगिनी
विनंती माझी नऊदिनी
तिजप्रत पोचवावी

तू  वाग्विलासिनी
मम  मनोरथा मानी
पूर्ण नेई कृपा करोनि
लाज राखी जनांत

प्रसन्न नामे कवीने
चिंतामणी कृपेने
आठवले ते मांडोनी
सुखावतो वाचकांसी

!! इति श्रीभवानी कृपे प्रथम पुष्पमाला अर्पणमस्तू !!

© कवी : प्रसन्न चिंतामणी आठवले
१०/१०/२०१८
अश्विन शुद्ध प्रतिपदा