ज्ञानयोग १

ज्ञानयोग १

llश्रीगणेशाय नमःll ज्ञानोबा माऊली तुकारामllश्रीगुरुवे नमःll

ज्ञानाचा सागर आणि संतांचे मेरुमणी वैष्णवांची माऊली संतश्रेष्ठ श्रीज्ञानेश्वर महाराज आणि मुकुटमणी संतश्रेष्ठ श्रीतुकाराम महाराज यांना साष्टांग दंडवत घालून आणि माझे सद्गुरू श्रीब्रम्हचैतन्य गोंदवलेकर महाराज यांना प्रणिपात करून एका नवीन विषयाला सुरवात करतोय. माऊलींच्या ओव्यांचा मला जाणवलेला गर्भित अर्थ. खूप मोठा विषय आहे. अनेक विद्वानांनी खूप काही लिहिलंय. तरीही त्यावर अजून कित्येक युगं लिहिता येईल इतकं गूढ आणि गर्भित माऊलींच्या ओव्यांमध्ये लपलेलं आहे. माऊलींच्या ओव्या म्हणजे ते क्षीर आहे ज्यातून कितीही नवनीत जमा केल तरी ते नवनीत आत दडलेल्या नवनीतापुढे कणभर देखील असणार  नाही.

माऊली संतश्रेष्ठ ज्ञानेश्वर महाराज जे लिहून गेलेत ते मुळात समजणं हा एका नव्हे तर अनेक जन्मांच्या पुण्याईचा परिपाक आहे. त्यामध्ये देखील माऊली स्वतः सांगतात की, एक तरी ओवी अनुभवावी. म्हणजेच पूर्ण जीवनभर एखादी ओवी जरी समजली, उमगली, कळली तरी ती जाणिवेत पोहोचून त्यावर अंमलबजावणी करण्यात उभा जन्म जाऊ शकतो. याची माऊलींना निःसंशय खात्री असावी.  म्हणून आईच्या मायेने माऊली सांगतात की,  बाळा हे क्षीर म्हणजे दूध खूप कढत आहे , तापलेल आहे तेंव्हा एक एक थेंब घे, म्हणजे राजा तुला भाजणार नाही , तुझी जाणिवेची जिव्हा पोळणार नाही . अन्यथा इतकं सोप्प तुला तुझ्या भाषेत नीट समजावून सांगून काय उपयोग.

हे मी स्वतः जाणून आहे की माऊलींची एक एक ओवी ही शत शत सूर्याचं तेज आणि ओज आहे. ज्यामध्ये काहीही चूक घडल्यास  अर्थाचा अनर्थ होऊ शकतो हे नक्की. पण माऊली स्वतः जगतजननी असल्यामुळे तिच्या ज्ञानाच्या तव्यावर पोळी भाजताना हात शेकला तरी काळजी घ्यायला माऊली समर्थ आहे.  म्हणून प्रत्यक्ष माऊलींची क्षमा मागून जे सुचलं आणि गुरुप्रेरणेने जे आलं ते तुमच्यापुढे मांडण्याचा यत्न करीन. काही चुकल्यास माऊलींप्रमाणेच आपणही क्षमा कराल हा विश्वास आहे.

उद्या ज्या ओवीवर आपण बोलणार आहोत किंवा ज्या ओवीचा गर्भाथ जाणून घेणार आहोत ती ओवी आहे:

अरे अरे ज्ञाना झालासी पावन
तुझे तुज ध्यान कळो आले
तुझा तूंचि भाव तुझा तूंचि देह
फिटला संदेह अन्य तत्वे

प्रेरणा : श्रीसद्गुरू
© संकल्पना आणि लेखन : प्रसन्न आठवले
१८/०७/२०१८