नवरात्र २०१९ माळ ५

नवरात्रातील पाचवी माळ श्रीस्कंदमाता

सिंहासनगता नित्यं पद्माश्रितकरद्वया |
शुभदास्तु सदा देवी स्कन्दमाता यशस्विनी ||

भगवान श्री कार्तिकेय हे स्कंद या नावाने देखील ओळखले जातात. देवासुर संग्रामात हे देवांचे सेनापती होते. यांनाच कुमार आणि शक्ती या नावाने देखील त्यांना ओळखतात. यांची माता असल्याने देवीच्या या रुपाला देवी स्कंदमाता म्हणून ओळखलं जातं.

ही चतुर्भुजा देवी असून दोन्हीकडच्या वरच्या हातात कमलपुष्प असून खालील डावा हात वर देण्यासाठी उचलला आहे. उजव्या बाजूच्या खालील हाताने आसनावर विराजमान भगवान स्कंद यांना धरलेलं आहे. देवी कमळाच्या आसनावर विराजित असल्या कारणे देवीला पद्मासना देवी या नावाने देखील संबोधले जाते.  देवी सिंहारूढ आहे.

स्कंदमातेच्या उपासनेने भक्तांच्या इच्छा कामना पूर्ण होतात. या संसारातच मनुष्याला परम सुख , शांती आणि समाधान यांची अनुभूती प्राप्त होते. साधकांसाठी मोक्षाची द्वारं स्वमेव सुलभ होतात. स्कंदमातेच्या पूजनाने आणि साधनेने स्कंदाच्या अर्थात भगवान कार्तिकेयाच्या उपासनेचा लाभ स्वमेव प्राप्त होतो. हा लाभ फक्त स्कंदमातेच्या भक्तांना प्राप्त होतो. म्हणून मातेच्या उपासनेकडे भक्तांनी विशेष ध्यान दिले पाहिजे.

सुर्यमंडलाची अधिष्ठात्री देवी असल्या कारणे देवीचे उपासक अलौकिक तेज व कांतीने संपन्न होऊन जातात. एक अलौकिक प्रभामंडल साधकांच्या चाहुबाजूला परिव्याप्त असतं. हे प्रभामंडल त्या साधकाचे योगक्षेम निर्वाहन करतं.
आपण यश कीर्ती आणि तेज यांच्या प्राप्तीसाठी स्कंदमातेचं स्मरण करूया.

कार्तिकेय माता ज्या म्हणती स्कंद सारे
कीर्ती स्कंदाची तव कारण जाणती सारे
ऐश्या या पुत्राची जाणती तुज माता सारे

जय देवी जय देवी जय जय  स्कंदमाता
भक्तांचे दैन्य दूर करण्या धावत ये आता

सुर्यमंडली वास तुझा, जग सारे तव तेजे
भक्त तुझे उपासना करती दे तेज तुझे
भक्तांचे योगक्षेम वाहसी हे ब्रीद तुझे

जय देवी जय देवी जय जय  स्कंदमाता
भक्तांचे दैन्य दूर करण्या धावत ये आता

भक्तीने प्राप्त होय सुख शांती समाधान
स्वानंदे  जाणवते संसार होई सुलभ जाण
मोहाचे क्षण येती जाती हे ही समाधान

जय देवी जय देवी जय जय  स्कंदमाता
भक्तांचे दैन्य दूर करण्या धावत ये आता

©® लेखन व काव्य : प्रसन्न चिंतामणी आठवले
०३/१०/२०१९
माळ पाचवी अर्पण !!!  🚩🚩🚩🌷🌷🌷