नवरात्र २०१९ माळ ४

नवरात्रातील चवथी माळ श्रीकुष्मांडा देवी

सुरासंपूर्णकलशं रुधिराप्लुतमेव च।
दधाना हस्तपद्माभ्यां कूष्माण्डा शुभदास्तु मे ॥

ज्यावेळी सृष्टीची निर्मितीसुद्धा झाली नव्हती त्यावेळी समस्त ब्रम्हांडाची रचना कुष्मांडा देवीने केली. आपल्या एका हास्यातून या अंड अर्थात ब्रह्मांड निर्माण केलं म्हणून देवीला कुष्मांडा हे नाव प्राप्त झालं. म्हणून या सृष्टीची ती आदीस्वरूपा , आदिशक्ती आहे. देवीचं निवासस्थान सुर्यमंडल आहे. तिथे राहण्याची शक्ती व क्षमता समस्त सृष्टीत फक्त माता कुष्मांडाकडे आहे. देवीची कांती आणि प्रभा ही सुर्यतेजाप्रमाणे आहे.

देवीच्या तेज आणि प्रकाशाने समस्त विश्व दैदिप्यमान आणि प्रकाशित आहे. विश्वातील सर्व प्राणी आणि मानव यांच्यात उदित होणारे तेज हे देवी कुष्मांडाचीच छाया आहे. या देवीला आठ हात आहेत. म्हणून देवी अष्टभुजा देवी म्हणूनही प्रसिद्ध आहे. देवीच्या सात हातांमध्ये अनुक्रमे कमंडलू, धनुष्य , बाण , कमलपुष्प , अमृतपूर्ण कलश, चक्र तथा गदा आहे. आठव्या हातात सिद्धी आणि निधी देणारी जपमाला आहे. देवीचं वाहन सिंह आहे.

देवी कुष्मांडाच्या उपासनेने भक्त रोगमुक्त होतो. देवीच्या आराधनेने आयु: बल , यश आणि आरोग्य यांची सुदृढता मिळते. देवी अत्यल्प सेवेने भक्तांना प्रसन्न होऊन वर देते. जर एखादा भक्त अंतःकरणापासून देवीची प्रार्थना करेल तर  तो परम पदाला अवश्य प्राप्त करेल. देवीच्या भक्तिमार्गात काही अंतर पुढे गेल्यास साधकास अनेक दिव्य अनुभव येण्यास सुरुवात होते. समस्त सांसारिक आपदा आणि अडचणी या त्याच्यापासून दूर जाण्यास सुरवात होते. अत्यंत कमी सेवेतही अनेक सिद्धी देणारी ही देवी आदीस्वरूपा आहे.

अश्या आदिशक्तीरूप देवीची प्रार्थना करून तिला प्रसन्न करण्यासाठी तिची अर्चना करूया.

कुष्मांडा माते तू यशदायी फलदायी तू
रंजित गांजीत भक्ता मती देसी आई तू

आदी तू शक्ती स्थित तुजमध्ये
वास तुझा रवीमंडली अग्निमध्ये
अगम्य स्वरूपा पाहु सगुणामध्ये
भक्त सापडले संसारी पाशामध्ये
धावत ये भक्तालागीं कृपा करी आई तू
कुष्मांडा माते तू यशदायी फलदायी तू

अल्पमती आम्ही तव भक्ती करू
अल्प स्वल्प सेवेला तुजला वाहू
यथाशक्ती जे साधे तुजला अर्पू
मनी तुझ्या रुपाला अखंड पुजू
तव भक्ती करण्याची मती आम्हा दे तू
कुष्मांडा माते तू यशदायी फलदायी तू

सिंहारूढ तव मूर्ती अष्टभुजा देवी तू
तिरकमठा कमंडलू अमृत धारी तू
चक्र गदा शस्त्राने असुरांना मारी तू
सिद्धी निधी देऊनिया भक्ता वारी तू
अभय दे अक्षय दे पाशातुन सोडवी तू
कुष्मांडा माते तू यशदायी फलदायी तू

प्रसन्न होसी निजभक्ता इच्छित देसी
भक्तांच्या इच्छेस्तव चिंतामणी होसी
आठवले ते वाहतो हर्षे स्वीकारिसी
चतुर्थ पुष्प वाहतो मी तव चरणाशी
आनंदे या स्वीकारून यश देसी आई तू
कुष्मांडा माते तू यशदायी फलदायी तू

©® लेखन व काव्य : प्रसन्न चिंतामणी आठवले
०२/१०/२०१९
माळ चतुर्थ अर्पण !!!  🚩🚩🚩🌷🌷🌷