उठी उठी गोपाला भाग ३

उठी उठी गोपाला या गीतावर स्वैर लेख भाग ३

मलयगिरीचा चंदनगंधित धूप तुला दाविला 
स्वीकारावी पूजा आता, उठी उठी गोपाला 

पूर्व दिशेला गुलाल उधळुन ज्ञानदीप लाविला 
गोरस अर्पुनि अवघे गोधन गेले यमुनेला 
धूप दीप नैवेद्य असा हा सदुपचार चालला 

रांगोळ्यांनी सडे सजविले रस्त्यारस्त्यांतुन 
सान पाऊली वाजति पैंजण छुन छुनन छुन छुन
कुठे मंदिरी ऐकू येते टाळांची किणकिण 
एकतानता कुठे लाविते एकतारीची धून 
निसर्ग मानव तुझ्या स्वागता असा सिद्ध जाहला 

राजद्वारी झडे चौघडा शुभःकाल जाहला 
सागरतीरी ऋषीमुनींचा वेदघोष चालला 
वन वेळूंचे वाजवि मुरली, छान सूर लागला 
तरुशिखरावर कोकिलकविने पंचम स्वर लाविला 

गीतकार : बाळ कोल्हटकर, 
गायक : कुमार गंधर्व
संगीतकार : वसंत देसाई
नाटक : देव दिना घरी धावला

राज्यातल्या अनेकविध मंदिराच्या दिपमाळेच्या खांबावर रात्री केलेली दिव्याची रोषणाई अजून पहाटे पर्यन्त तशीच आहे. ती वातावरणातील स्निग्धता कायम ठेवत आहे.  अश्या सर्व मंदिरांची गोपुरे आकर्षक सजावटीने सजलेली आहेत. त्या मंदिरांचे सुवर्ण आणि रत्नजडित कळस सूर्याच्या प्रभेची प्रतीक्षा करत आहेत. त्या मंदिरातील पूजापाठ करणाऱ्या ब्रम्हवृन्दानी ब्राम्हमुहूर्ती शुचिर्भूत होऊन षोडशोपचारे पूजा विधी केले असून, आता त्या सर्व मंदिरात टाळमृदूंगांच्या तालात आरत्या सुरू आहेत.  त्या टाळाचा किण किण असा सुंदर मधुर नाद आध्यात्मिक उंची गाठत आहे. 

मंदिर परिसरात आणि नगरात साधू संन्यासी हे मोठ्या आनंदाने, समाधानाने आणि निश्चिन्त मनाने आसनस्थ आहेत. असे साधू संन्यासी हातात एकतारी घेऊन प्रभुकीर्तनात व भक्तीत लीन आहेत. त्यांच्या एकतारीचा नाद त्यांच्या एकाग्रतेत भर घालून त्यांना ध्यान धारणेतून नामसमाधीकडे घेऊन जात आहे. जणू त्यांना एकाग्रता मिळावी म्हणूनच त्या एकतारीचा जन्म झाला आहे असाच भास त्यांच्या समाधीतून होत आहे. हे मोठे अलौकिक अधिआत्मिक दृश्य आहे. 

हे देवाधिदेव केशवा, तुझेच निर्मितिरूप प्रत्यक्ष ब्रह्मांड आणि त्या ब्रह्मांडाचे प्रतीक असलेले निसर्ग नामभिधान असलेले तुझे प्रतिबिंब आणि  तुझेच प्रतिरूप असलेले मानव अर्थात सर्व नगरवासी वर वर्णन केलेल्या सर्व तयारीसह तुझे स्वागत करण्यास  सिद्ध झाले आहेत, अर्थातच तुझ्या निद्रेतून जागृत होण्याची प्रतीक्षा करत आहे.  हे माधवा तू जरी चक्षुप्रतिकाने निद्रेत असलास तरीही चारचरावर तुझी अखंड जागृत दृष्टी अष्टौप्रहर  जगातील प्रत्येक गोष्टीचा वेध घेत असते, तरीही आम्हा पामरांच्या लेखी देहबुद्धीमुळे , हे कृष्णा तू देहरुपाने निद्रेत भासत असल्यामुळे तू देहरूपी निद्रेतून जागृत व्हावास यास्तव प्रभातीची सजावट घेऊन निसर्ग आणि आध्यात्मिक भक्तीची आरती घेऊन मानव तुझ्या स्वागताला सिद्ध आहेत.

© संकल्पना व लेखन : प्रसन्न आठवले 

१२/०९/२०१८