गीत विश्लेषण 'कैवल्याच्या चांदण्याला ' भाग ६ व अंतिम
संपूर्ण गीत
कैवल्याच्या
चांदण्याला भुकेला
चकोर
चंद्र व्हा हो
पांडुरंगा, मन करा थोर
बालवयी खेळी रमलो,
तारुण्य नासले
वृद्धपणी देवा आता दिसे
पैलतीर
जन्ममरण नको आता, नको
येरझार
नको ऐहिकाचा नाथा
व्यर्थ बडिवार
चराचरा पार न्या हो
जाहला उशीर
'पांडुरंग' 'पांडुरंग'.
मन करा थोर
गीत : अशोकजी परांजपे
संगीत आणि स्वर : पंडित जितेंद्र अभिषेकी
हे ऐहिकाचं अवडंबर दूर करा पांडुरंगा , पंढरीराया. इतकं तरी निदान मान्य करा , या पामराचं.
हे पांडुरंगा विठ्ठला या जगताच्या, दृश्यमान भूमीच्या, या चराचराच्या , या विश्वाच्या , लौकिक व भौतिक जगाच्या पार जिथे विश्वनियंता म्हणजेच परमात्मा आणि आत्मा यांचं मिलन होतं अश्या कैवल्यधामी मला न्या दयाळा. अजून किती वाट पहायची आधीच उशीर झालाय. सर्व जन्म व्यर्थ घालवून जगरहाटीच्या प्रवाहात वहात जाऊन आधीच तुझ्यापर्यंत येण्यास उशीर केलाय मी.
जगतचालक आपण महान आहात , थोर आहात. हे पांडुरंगा पंढरीराया आपण आपल्या विशाल व उदार अंतःकरणाचा प्रत्यय देऊन या पामराला जन्म मृत्यू फेऱ्याच्या पार नेऊन मोक्ष, मुक्ती, कैवल्य याचा प्रत्यय द्यावा आणि भक्तवत्सल हे ब्रीद सार्थ करा विठ्ठला.
समाप्त
© संकल्पना व लेखन : प्रसन्न आठवले
२८ /०१/२०१९
Comments
Post a Comment