सद्गुरूंना भावांजली :

सद्गुरू श्रीब्रह्मचैतन्य गोंदवलेकर महाराज पुण्यतिथी पावन दिनानिमित्त सद्गुरूंना भावांजली :

भ्रमित थकीत मन स्थिर राहो
श्रीगुरु रामनामी मन दृढ राहो

ब्रम्हाचे चैतन्य तुम्ही हो
नामाचा आदर्श तुम्ही हो
नामी झाला रत तुम्ही हो
श्रीगुरुपदा सार्थ तुम्ही हो
श्रीगुरु रामनामी मन दृढ राहो

गुरू भेटीस्तव त्यागिले घरा
चरण झिजवूनी फिरले धरा
श्रीतुकाई माय भेट हो वरा
चरण धरुनी तुम्ही  सेवा केली हो
श्रीगुरु रामनामी मन दृढ राहो

त्रयोदशाक्षरी मंत्र मिळवूनी
शिष्योत्तम हा धर्म राखुनी
प्रभू रामाचे दर्शन होऊनि
जगता दिधला सिद्धमंत्र हो
श्रीगुरु रामनामी मन दृढ राहो

गोंदवले ग्रामास परतुनी
नामसेवा ही एकच जननी
तीच ईश्वराची स्वरधुनी
केले ग्रामा पावन तुम्ही हो
श्रीगुरु रामनामी मन दृढ राहो

नामाची महती सांगूनी
करा सार्थ जन्मालागूनी
साधा हाच जन्म पावनी
जगा सांगितले जपा नाम हो
श्रीगुरु रामनामी मन दृढ राहो

उभा जन्म वाहिला नामा
घेऊनि नामा म्हणा श्रीरामा
तेरा कोटी होता जप नामा
दर्शन प्रभूंचे होई वचन हो
श्रीगुरु रामनामी मन दृढ राहो

घेऊनि नामा करा कर्म हो
नाम माना एकची धर्म हो
नाममहती देऊनी मर्म हो
साधा हित आपुले साधक हो
श्रीगुरु रामनामी मन दृढ राहो

प्रसन्न साधक वृत्ती राहो
चिंतामणी या नामी पाहो
आठवले नामात रत हो
सेवा मानून घ्यावी गुरु हो
श्रीगुरु रामनामी मन दृढ राहो

© कवन :प्रसन्न आठवले
३१/१२/२०१८