अशीच व्हावी ........
अशीच व्हावी या वळणावर, भेट हि सुंदर पत्रामधुनी
तळमळ पोचावी तूजप्रत ती, सखये चित्रित शब्दांमधूनी
भावफुलांचा गंध शिंपडून, केली शाई लिहिण्यासाठी
वाचावे गुज वाटे तू हे, तुझिया स्वप्नील डोळ्यांमधुनी
अशीच व्हावी ........
पोचतील का भाव अनामिक, वाटे हूरहूर शब्द तोकडे
तूज समजावू वाटे प्रीती, अलगद हिरव्या पानांमधूनी
अशीच व्हावी ........
वारा हितगूज सांगे वाटे, सूर पोचविल सम्बोधीन तूज
अर्थ पोचविल का, मी शंकित, मनी असे जो झूळूकीमधूनी
अशीच व्हावी ........
मेघ जाहले दूत एकदा, होतील का ते मला सहाय्यी
सर्व सार का अचूक नेतील, ओलाव्या श्रावणसरीमधूनी
अशीच व्हावी ........
यातील कोणी काही करणे, संभव वाटे नच मनी किल्मिष
तूच येऊनि स्वये पुसावे, प्रेम अलौकिक नयनामधुनी
अशीच व्हावी ........
कवी : प्रसन्न आठवले
Comments
Post a Comment